बीडमध्ये धक्कादायक प्रकार: आमदार प्रकाश सोळंके यांच्या शाळेतील वसतिगृहातून १० वीचे ३ विद्यार्थी बेपत्ता
बीड जिल्ह्यातील माजलगाव येथील एका नामांकित शाळेच्या वसतिगृहातून ३ विद्यार्थी रात्री बेपत्ता झाल्याची धक्कादायक घटना समोर आली आहे.
Eduvarta
एज्युवार्ता न्यूज नेटवर्क
बीड जिल्ह्यातील माजलगाव येथील एका नामांकित शाळेच्या वसतिगृहातून ३ विद्यार्थी रात्री बेपत्ता झाल्याची धक्कादायक घटना समोर आली आहे. आमदार प्रकाश सोळंके हे अध्यक्ष असलेल्या सिंदफणा पब्लिक स्कूलच्या वसतिगृहात १०वीच्या वर्गातील ३ विद्यार्थी रात्रीच्या जेवणानंतर अचानक बेपत्ता झाले. हजेरीवेळी ते आपापल्या खोलीत किंवा परिसरात कुठेही आढळले नाहीत. यामुळे शाळा व्यवस्थापन आणि पालकांमध्ये प्रचंड घबराट पसरली असून सध्या शोध सुरू आहे.
रात्रीच्या जेवणानंतर नेहमीप्रमाणे वसतिगृह व्यवस्थापकांनी विद्यार्थ्यांची उपस्थिती तपासली. त्यावेळी १०वीच्या ३ विद्यार्थ्यांचा थांगपत्ता लागू शकला नाही. व्यवस्थापनाने तातडीने वसतिगृहाचा संपूर्ण परिसर, मैदान आणि आसपासच्या भागात शोध घेतला. मात्र विद्यार्थ्यांचा कोणताही शोध लागला नाही. या घटनेमुळे वसतिगृहातील सुरक्षा व्यवस्थेवर गंभीर प्रश्न उपस्थित झाले आहेत. विद्यार्थी मुख्य गेटमधून बाहेर पडले की मागील भिंतीवरून गेले, हे अद्याप स्पष्ट झालेले नाही.
बेपत्ता झालेले तिन्ही विद्यार्थी दहावीच्या वर्गातील आहेत. एक विद्यार्थी पाथरी जि. परभणी येथील आहे, दुसरा नित्रुड ता. माजलगाव जि. बीड येथील आहे तर तिसरा आष्टी जि. बीड परिसरातील आहे, अशी माहिती
शाळेचे प्राचार्य शेख अन्वर यांनी दिली आहे. विद्यार्थी गायब झाल्याची बातमी कळताच पालकांनी शाळेकडे धाव घेतली. त्यांनी आपल्या मुलांना लवकर शोधून काढण्याची विनंती केली आहे. सध्या प्रशासन आणि पालक मिळून शोध घेत आहेत.
या घटनेमुळे वसतिगृहाच्या सुरक्षा यंत्रणेबाबत अनेक प्रश्न निर्माण झाले आहेत. घटनेच्या वेळी सीसीटीव्ही कॅमेरे कार्यरत होते का?, सुरक्षारक्षक गेटवर हजर होते का? आणि प्रवेश-निर्गमन नोंदवहीत काही नोंद आहे का?, हे अद्याप स्पष्ट होऊ शकलेले नाही. या प्रश्नांची उत्तरे मिळण्यासाठी चौकशी सुरू आहे. पालक आणि व्यवस्थापन यांच्यात चिंताजनक वातावरण निर्माण झाले असून लवकरात लवकर विद्यार्थी सापडावेत, असे मत व्यक्त करण्यात येत आहे.
