मएसो सिनियर कॉलेजमध्ये ‘पंडित दीनदयाळ उपाध्याय रोजगार महाकुंभ – महाराष्ट्र’ चे आयोजन

एज्युवार्ता न्यूज नेटवर्क 

विद्यार्थी, पदवीधर तसेच रोजगाराच्या शोधात असलेल्या युवकांना उद्योगविश्वाशी जोडून त्यांच्या कौशल्यांना अनुरूप रोजगाराच्या संधी उपलब्ध करून देण्याच्या उद्देशाने ‘पंडित दीनदयाळ उपाध्याय रोजगार महाकुंभ – महाराष्ट्र’ या रोजगार मेळाव्याचे आयोजन सावित्रीबाई फुले पुणे विद्यापीठ, पुणे आणि मएसो सिनियर कॉलेज, पुणे यांच्या संयुक्त विद्यमाने मएसो सीनियर कॉलेज, कोथरूड, पुणे येथे करण्यात आले आहे. या रोजगार मेळाव्यात ११ उद्योग व कंपन्यांचा सहभाग असून एकूण ८१ रोजगाराच्या संधी उपलब्ध होणार आहेत.

या कार्यक्रमाचे उद्घाटन सावित्रीबाई फुले पुणे विद्यापीठाच्या नवोपक्रम, उद्योजकता, इनक्युबेशन व उद्योग-संलग्नता विभागाचे संचालक प्रा. (डॉ.) देविदास गोल्हार, जनसेवा सहकारी बँकेचे अध्यक्ष डॉ. राजेंद्र  हिरेमठ आणि महाराष्ट्र एज्युकेशन सोसायटीचे संचालक श्री. विजय  भालेराव  यांच्या प्रमुख उपस्थितीत कार्यक्रमाचे उद्घाटन करण्यात येणार आहे.

रोजगार मेळाव्यामध्ये विविध क्षेत्रांतील उद्योग व कंपन्यांचा सहभाग असल्याने विद्यार्थ्यांना आणि पदवीधरांना त्यांच्या शैक्षणिक पात्रता, कौशल्ये आणि आवडीच्या क्षेत्रानुसार रोजगाराच्या संधींची माहिती मिळणार आहे. माहिती तंत्रज्ञान, व्यवस्थापन, विक्री, विपणन, लेखा, विमा, व्यवसाय विकास, डेटा विश्लेषण, अभियांत्रिकी, आदरातिथ्य, माध्यमे, कृषी उपकरणे, ऑटोमेशन आदी विविध क्षेत्रांमध्ये रोजगाराच्या संधी उपलब्ध करून देण्यात येणार आहेत.

या रोजगार मेळाव्यात सहभागी होणाऱ्या कंपन्यांमध्ये Teja Hospitality, Shakham Inc., Crazy Cheesy Enterprises, WeAgile Software Solutions Pvt. Ltd., Airattix Storage Pvt. Ltd., Hovers, Mehta Tools and Machinery, Bajaj Life Insurance, Media Vidya, Fortune Agri Equipment Pvt. Ltd. आणि Tech Mark Automation and Controls यांचा समावेश आहे. संबंधित कंपन्यांकडून सहभागी उमेदवारांसाठी मुलाखत व निवड प्रक्रिया राबविण्यात येणार आहे.

रोजगाराच्या शोधात असलेल्या युवकांना थेट उद्योग प्रतिनिधींशी संवाद साधण्याची आणि उपलब्ध पदांविषयी माहिती जाणून घेण्याची संधी या उपक्रमातून मिळणार आहे. विद्यार्थ्यांना केवळ रोजगाराच्या संधी उपलब्ध करून देण्याबरोबरच त्यांच्या कौशल्यांचा उद्योगाच्या गरजांशी मेळ घालण्यास या उपक्रमाची मदत होणार आहे. तसेच पदवीधर आणि रोजगाराच्या शोधात असलेल्या युवकांना विविध क्षेत्रांतील उपलब्ध संधी, आवश्यक कौशल्ये आणि निवड प्रक्रियेची माहिती मिळण्यास मदत होईल.

‘पंडित दीनदयाळ उपाध्याय रोजगार महाकुंभ – महाराष्ट्र’ या उपक्रमातून शिक्षणसंस्था आणि उद्योगविश्व यांच्यातील संपर्क अधिक दृढ करण्याच्या उद्देशाने रोजगाराच्या संधी उपलब्ध करून देण्यात येत आहेत. विविध कंपन्यांच्या प्रतिनिधींच्या उपस्थितीत होणाऱ्या मुलाखती आणि निवड प्रक्रियेमुळे सहभागी उमेदवारांना रोजगाराच्या संधींसाठी थेट प्रयत्न करता येणार आहेत.