एआय कौशल्यविकासासाठी उच्च शिक्षण विभागाचा पुढाकार
कृत्रिम बुद्धिमत्ता (AI), क्लाउड कॉम्प्युटिंग आणि इलेक्ट्रॉनिक्स उत्पादन या क्षेत्रांमध्ये विद्यार्थ्यांना प्रशिक्षण देण्यावर बैठकीत विशेष भर देण्यात आला. पदवी शिक्षणासोबतच विद्यार्थ्यांना डिजिटल कौशल्ये तसेच प्रत्यक्ष कामाच्या ठिकाणी उपयुक्त ठरणारे तंत्रज्ञानाचे ज्ञान मिळावे, यासाठी उद्योग आणि सामाजिक संस्थांचे सहकार्य घेण्याबाबतही चर्चा झाली.
Eduvarta
एज्युवार्ता न्यूज नेटवर्क
बदलत्या उद्योगक्षेत्राच्या गरजांनुसार उच्च शिक्षणातील विद्यार्थ्यांचा कौशल्यविकास करून त्यांची रोजगारक्षमता वाढविण्याच्या दृष्टीने उच्च व तंत्र शिक्षण विभागाने पुढाकार घेतला आहे. विद्यार्थ्यांनी केवळ पारंपरिक अभ्यासक्रमापुरते मर्यादित न राहता उद्योगक्षेत्रातील बदलत्या गरजा आणि तंत्रज्ञानाची ओळख करून घेत त्यानुसार आवश्यक कौशल्ये आत्मसात करावीत, या उद्देशाने डेल टेक्नॉलॉजीजसोबत सामंजस्य करार करण्याची प्रक्रिया प्रस्तावित करण्यात आली आहे.
यासंदर्भात मंत्रालयात उच्च व तंत्र शिक्षण मंत्री चंद्रकांत पाटील यांच्या अध्यक्षतेखाली डेल टेक्नॉलॉजीज आणि लर्निंग लिंक्स फाउंडेशनच्या ‘उडान’ कार्यक्रमाच्या प्रतिनिधींसोबत बैठक झाली. या बैठकीत विद्यार्थ्यांसाठी विविध प्रशिक्षण व कौशल्यविकासाच्या संधी उपलब्ध करून देण्याबाबत सविस्तर चर्चा करण्यात आली.
कृत्रिम बुद्धिमत्ता (AI), क्लाउड कॉम्प्युटिंग आणि इलेक्ट्रॉनिक्स उत्पादन या क्षेत्रांमध्ये विद्यार्थ्यांना प्रशिक्षण देण्यावर बैठकीत विशेष भर देण्यात आला. पदवी शिक्षणासोबतच विद्यार्थ्यांना डिजिटल कौशल्ये तसेच प्रत्यक्ष कामाच्या ठिकाणी उपयुक्त ठरणारे तंत्रज्ञानाचे ज्ञान मिळावे, यासाठी उद्योग आणि सामाजिक संस्थांचे सहकार्य घेण्याबाबतही चर्चा झाली.
तंत्रज्ञानाच्या झपाट्याने बदलणाऱ्या क्षेत्रांमध्ये निर्माण होणाऱ्या रोजगाराच्या संधींसाठी विद्यार्थ्यांना तयार करणे, हा या उपक्रमाचा प्रमुख उद्देश आहे. प्रस्तावित सामंजस्य करारातून प्रशिक्षणाचे स्वरूप, उपलब्ध संधी आणि डेल टेक्नॉलॉजीजसोबतच्या सहकार्याची पुढील दिशा निश्चित केली जाणार आहे.
या बैठकीस अपर मुख्य सचिव बी. वेणुगोपाल रेड्डी, उच्च शिक्षण संचालक डॉ. शैलेंद्र देवळाणकर, तंत्रशिक्षण संचालक डॉ. प्रमोद नाईक, डेल टेक्नॉलॉजीजचे सीएसआर प्रमुख प्रभात भट्टाचार्य तसेच लर्निंग लिंक्स फाउंडेशनचे गणेश भागवत उपस्थित होते.
