आधी शिक्षकाने दोन लेकरांसह आयुष्य संपवलं ,आता शिक्षक पत्नीने आत्महत्या केली; एकाच कुटुंबातील चौघांचा अंत
नांदेड जिल्ह्यातील हिमायतनगर तालुक्यातील पोटा येथील एका शिक्षकाच्या कुटुंबात अवघ्या तीन महिन्यांत संपूर्ण परिवार संपल्याची धक्कादायक घटना समोर आली आहे.
Eduvarta
एज्युवार्ता न्यूज नेटवर्क
नांदेड जिल्ह्यातील हिमायतनगर तालुक्यातील पोटा येथील एका शिक्षकाच्या कुटुंबात अवघ्या तीन महिन्यांत संपूर्ण परिवार संपल्याची धक्कादायक घटना समोर आली आहे. जिल्हा परिषद शाळेत कार्यरत असलेले ४२ वर्षीय शिक्षक सुनील मोरे यांनी काही महिन्यांपूर्वी आपल्या दोन लेकरांसह आयुष्य संपवले. त्यानंतर त्यांच्या पत्नी शिक्षिका धम्मशीला मोरे यांनीही आत्महत्या केली. यामुळे पती, दोन मुले आणि पत्नी अशा एकाच कुटुंबातील चारही सदस्यांचा अंत झाला आहे. परिसरात या घटनेमुळे हळहळ व्यक्त केली जात आहे.
सुनील मोरे यांनी वरिष्ठ अधिकाऱ्यांच्या सततच्या त्रासाला कंटाळून हे टोकाचे पाऊल उचलल्याचे त्यांच्या संदेशातून स्पष्ट झाले होते. त्यांनी गट शिक्षण अधिकारी किशन फोले, विस्तार अधिकारी सूर्यकांत बाचे, केंद्रप्रमुख शिवाजी कदम आणि सहकारी शिक्षक दत्ता पवळे यांच्या त्रासाचा उल्लेख केला होता. १४ वर्षांची मुलगी सारा आणि १० वर्षांचा मुलगा सुमेध यांच्यासोबत त्यांनी १७ जुलै रोजी आयुष्य संपवले. या घटनेनंतर कुटुंबात खोल दुःखाचे वातावरण निर्माण झाले.
पती आणि दोन्ही मुलांच्या अचानक निघून जाण्याने धम्मशीला मोरे या अत्यंत भीषण मानसिक तणावाखाली होत्या. गेल्या तीन महिन्यांपासून त्या सतत दुःखात होत्या आणि घराबाहेर पडणेही बंद केले होते. यापूर्वीही त्यांनी स्वतःला संपवण्याचा प्रयत्न केला होता. दोन दिवसांपूर्वी पुन्हा प्रयत्न केल्यानंतर त्यांना गंभीर अवस्थेत रुग्णालयात दाखल करण्यात आले. उपचारादरम्यान काल रात्री त्यांचाही मृत्यू झाला.
अशा प्रकारे अडीच ते तीन महिन्यांच्या अंतराने मोरे कुटुंबातील चारही जणांचा दुर्दैवी अंत झाला आहे. सुखी परिवार असलेल्या या कुटुंबातील ही घटना संपूर्ण परिसरात शोककळा पसरवत आहे. शिक्षण विभागातील अधिकाऱ्यांच्या वागणुकीबाबतही चर्चा सुरू झाली आहे. या दुःखद घटनेने स्थानिकांमध्ये हळहळ व्यक्त केली जात असून कुटुंबाच्या नातेवाईकांना धीर देण्यात येत आहे.
