फॉरेन्सिक ऑडिट पूर्वीच डॉ.आदित्य अभ्यंकर झाले रुजू; विद्यापीठाचा सावळा गोंधळ 

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या अधिसभेत फॉरेन्सिक ऑडिटच्या मागणीनंतर विद्यापीठाच्या तंत्रज्ञान विभागाचे प्रमुख डॉ. आदित्य अभ्यंकर यांना सक्तीच्या रजेवर पाठवण्यात आले. सुमारे सहा महिने विद्यापीठाचे फॉरेन्सिक ऑडिट झाले नाही. मात्र, त्यापूर्वीच अभ्यंकर यांना विद्यापीठाच्या कॉम्प्युटर सायन्स विभागात प्राध्यापक म्हणून रुजू करून घेण्यात आले, अशी माहिती विश्वसनीय सूत्रांनी दिली आहे. परंतु, तंत्रज्ञान विभागाचे प्रमुख म्हणून कार्यरत असलेल्या अभ्यंकर यांना दुसऱ्या विभागात का रुजू करून घेतले. तसेच फॉरेन्सिक ऑडिट पूर्ण होण्यापूर्वी अभ्यंकर यांना पुन्हा जॉईन केल्याने अधिसभा सदस्य शांत बसणार आहेत का? असे अनेक प्रश्न निर्माण झाले आहेत. त्यामुळे विद्यापीठात एकूणच सावळा गोंधळ सुरू असल्याचे दिसून येत आहे.

सावित्रीबाई फुले पुणे विद्यापीठाला आदिवासी विभागाकडून प्राप्त झालेल्या एका प्रकल्प अंतर्गत मिळालेल्या निधीमध्ये भ्रष्टाचार झाला असल्याचा आरोप विद्यापीठाच्या अधिसभेमध्ये करण्यात आला होता. त्यावर आदित्य अभ्यंकर यांच्यावर कारवाई करावी अशी मागणी करण्यात आली होती. अधिसभा सदस्यांच्या भावना विचारात घेऊन विद्यापीठाचे कुलगुरू डॉ. सुरेश गोसावी यांनी अभ्यंकर यांना सक्तीच्या रजेवर पाठवले होते. दरम्यान, विद्यापीठाचे फॉरेन्सिक ऑडिट सुरू झाले असल्याचे बोलले जात होते. तब्बल पाच ते सहा महिने फुल पगार देऊन अभ्यंकर यांना सक्तीच्या रजेवर पाठवून घरी बसवले होते. विद्यापीठ कायद्याच्या कोणत्या नियमात एखाद्या प्राध्यापकाला सुमारे सहा पगार देऊन घरी बसवता येते, याचे उत्तर आता विद्यापीठ प्रशासनाकडे मागितले जाणार आहे.

एखादा प्राध्यापक तंत्रज्ञान विभागात कार्यरत असताना त्याला दुसऱ्या विभागात प्राध्यापक म्हणून रुजू करून घेता येते का? तसेच तंत्रज्ञान विभागात मुळातच प्राध्यापकांची संख्या कमी असताना विभागप्रमुख म्हणून कार्यरत असलेले अभ्यंकर यांना दुसऱ्या विभागांमध्ये कोणत्या नियमाखाली नियुक्त केले. तसेच विभाग प्रमुख पदावर असताना अभ्यंकर यांनी प्राध्यापक म्हणून रुजू होण्याचा निर्णय का घेतला, असे अनेक प्रश्न यामुळे उपस्थित होत आहेत.

विद्यापीठाच्या अधिसभेने केलेल्या मागणीनुसार फॉरेन्सिक ऑडिट सुरू असल्याची चर्चा काही महिन्यांपूर्वी सुरू होती.परंतु, विद्यापीठात फॉरेन्सिक ऑडिट नाही तर कम्प्लाईन्स ऑडिट सुरू असल्याची माहिती नुकतीच समोर आली. त्यामुळे अधिसभा सदस्यांच्या मागणीला हरताळ फसला गेल्याचे निष्पन्न झाले. त्यामुळे आता अधिसभा सदस्य शांत बसतील, असे वाटत नाही. परिणामी पुढील काही दिवसात विविध कारणामुळे विद्यापीठात गोंधळाचे वातावरण निर्माण होईल, अशी चर्चा विद्यापीठ वर्तुळात सुरू झाली आहे.

दरम्यान, याबाबत विद्यापीठाची बाजू जाणून घेण्यासाठी विद्यापीठाचे प्रभारी कुलसचिव डॉ प्रफुल्ल पवार यांच्याशी संपर्क साधण्याचा प्रयत्न केला असता संपर्क होऊ शकला नाही.