अमरावतीत महाविद्यालयात विद्यार्थिनीवर भरदिवसा चाकूने प्राणघातक हल्ला
अमरावतीमधील एका महाविद्यालयात चाकूच्या हल्ल्यात डी.फार्मचा एक विद्यार्थी गंभीर जखमी झाला. पोलिसांनी आरोपीला ताब्यात घेतले असून तपास सुरू केला आहे.
Eduvarta
एज्युवार्ता न्यूज नेटवर्क
अमरावती शहरातील बडनेरा पोलीस ठाण्याच्या हद्दीत असलेल्या प्रो. राम मेघे महाविद्यालयाच्या आवारात मंगळवारी दुपारी एका विद्यार्थिनीवर चाकूने प्राणघातक हल्ला झाल्याची धक्कादायक घटना घडली. एका तरुणाने महाविद्यालयात शिरून विद्यार्थिनीच्या गळ्यावर वार केल्याने परिसरात खळबळ उडाली आणि दहशतीचे वातावरण निर्माण झाले. गंभीर जखमी झालेल्या विद्यार्थिनीला तातडीने रिम्स रुग्णालयात दाखल करण्यात आले असून तिच्यावर उपचार सुरू आहेत. ही घटना महाविद्यालयातील विद्यार्थी आणि कर्मचाऱ्यांना हादरून गेली.
पोलिसांच्या माहितीनुसार, आरोपीचे नाव नवीन मेघराज वानवानी आहे. जखमी विद्यार्थिनी आणि आरोपी दोघेही डी. फार्म द्वितीय वर्षात शिकत होते. त्यांची पूर्वीपासून ओळख होती. प्राथमिक माहितीनुसार एकतर्फी प्रेम आणि त्यानंतर झालेल्या वादातून हा हल्ला झाल्याचा संशय व्यक्त केला जात आहे. विद्यार्थिनी आरोपीला ओळखत होती, मात्र नंतर दोघांमध्ये दुरावा निर्माण झाला होता. आरोपी नैराश्यात होता आणि त्याने यापूर्वी आत्महत्येचा प्रयत्न केल्याचा दावाही केला जात आहे. पोलिसांनी सर्व बाजूंची पडताळणी सुरू केली असून नेमके कारण तपासाअंती स्पष्ट होईल, असे सांगितले आहे. आरोपी विद्यार्थिनीचा पाठलाग करीत होता का, हेही तपासले जात आहे.
हल्ला झाल्यानंतर महाविद्यालयातील विद्यार्थी आणि उपस्थित नागरिकांनी हल्लेखोराला जागीच पकडून चोप दिला. यात आरोपीच्या हातालाही दुखापत झाली. घटनेची माहिती मिळताच बडनेरा पोलिसांनी घटनास्थळी धाव घेत आरोपीला ताब्यात घेतले. हल्ल्यात वापरलेला चाकू जप्त करण्यात आला आणि प्रत्यक्षदर्शी विद्यार्थ्यांच्या जबान्या नोंदवल्या जात आहेत. घटनेचे गांभीर्य लक्षात घेऊन वरिष्ठ पोलीस अधिकाऱ्यांनी घटनास्थळी आणि रुग्णालयात जाऊन परिस्थितीची पाहणी केली.
पोलिसांनी या प्रकरणात सखोल चौकशी सुरू केली आहे. महाविद्यालयातील विद्यार्थी या घटनेने खूपच अस्वस्थ झाले आहेत. सुरक्षेबाबत चिंता व्यक्त होत असून प्रशासनाने योग्य ती पावले उचलण्याची अपेक्षा व्यक्त केली जात आहे. आरोपीविरुद्ध कायदेशीर कारवाई सुरू असून तपासाच्या पुढील टप्प्यांत अधिक तपशील समोर येण्याची शक्यता आहे. ही घटना शैक्षणिक परिसरात सुरक्षेच्या उपाययोजना अधिक बळकट करण्याची गरज अधोरेखित करते.
