शिक्षक आणि पदवीधर मतदारसंघ निवडणूकीबाबत विभागीय आयुक्तांचे निर्देश

एज्युवार्ता न्यूज नेटवर्क 

महाराष्ट्र विधान परिषदेसाठी पुणे विभाग शिक्षक मतदारसंघ आणि पुणे विभाग पदवीधर मतदारसंघातून प्रत्येकी एका सदस्याची निवडणूक घ्यावयाची आहे. यासंबंधीची घोषणा भारत निवडणूक आयोगाने नुकतीच केली असून त्यानुसार विभागीय आयुक्त तथा निवडणूक निर्णय अधिकारी पुणे विभाग शिक्षक मतदारसंघ आणि पुणे विभाग पदवीधर मतदारसंघ यांनी निवडणुकीची सूचना मंगळवारी प्रसिद्ध केली. 

निवडणूकीसाठीची नामनिर्देशनपत्रे (उमेदवारी अर्ज )उमेदवाराला किंवा त्याच्या कोणत्याही प्रस्तावकाला, निवडणूक निर्णय अधिकारी तथा विभागीय आयुक्त, पुणे विभाग, पुणे किंवा सहायक निवडणूक निर्णय अधिकारी तथा सहआयुक्त (सामान्य प्रशासन) विभागीय आयुक्त कार्यालय, विधान भवन पुणे यांचेकडे मंगळवार ६ ऑक्टोबर, २०२६ पर्यंत कोणत्याही दिवशी (सार्वजनिक सुट्टी व्यतिरिक्त) सकाळी ११ ते दुपारी ३ वाजेपर्यंत दाखल करता येतील. नामनिर्देशनपत्रावर उल्लेख केलेल्या ठिकाणी व वेळी मिळू शकतील.

नामनिर्देशनपत्रांची छाननी बुधवार ७ ऑक्टोबर २०२६ रोजी सकाळी ११ वाजेपासून निवडणूक निर्णय अधिकारी, पुणे विभाग शिक्षक मतदारसंघ  आणि पुणे विभाग पदवीधर मतदारसंघ तथा विभागीय आयुक्त, पुणे विभाग,  यांचे कार्यालयात करण्यात येईल. उमेदवारी मागे घेण्याबद्दलची सूचना उमेदवाराला किंवा उमेदवाराने लेखी प्राधिकार दिलेल्या त्याच्या कोणत्याही प्रस्तावकाला किंवा निवडणूक प्रतिनिधीला वरील  विनिर्दिष्ट केलेल्या कोणत्याही अधिकाऱ्यास त्यांच्या कार्यालयात शुक्रवार ९ ऑक्टोबर, २०२६ रोजी दुपारी ३ वाजेपर्यंत देता येईल. निवडणूक लढविली गेल्यास शुक्रवार २३ ऑक्टोबर, २०२६ रोजी सकाळी ८ ते दुपारी ४ वाजेपर्यंत मतदान घेण्यात येईल, असे या सुचनेद्वारे घोषित करण्यात आले आहे.

ही सूचना निवडणूक निर्णय अधिकारी, विभागातील सर्व जिल्हाधिकारी तथा सहाय्यक निवडणूक निर्णय अधिकारी तसेच उपजिल्हा निवडणूक अधिकारी यांच्या कार्यालयातील सुचना फलकावर प्रसिद्ध करण्यात आली आहे. याबरोबरच विभागातील सर्व जिल्हा परिषदांचे मुख्य कार्यकारी अधिकारी उपविभागीय अधिकारी, तहसीलदार, महापालिका आयुक्त, नगरपालिका तसेच पंचायत समिती व ग्रामपंचायती कार्यालयातही प्रसिद्ध करण्याबाबत आदेशित करण्यात आले आहे, असेही निवडणूक निर्णय अधिकारी  तथा विभागीय आयुक्त शीतल तेली-उगले यांनी कळविले आहे.  
--------------

पुणे विभाग शिक्षक व पदवीधर मतदारसंघ निवडणूक: व्यापक मतदार जनजागृती करण्याचे विभागीय आयुक्तांचे निर्देश

महाराष्ट्र विधान परिषदेच्या पुणे विभाग शिक्षक आणि पुणे विभाग पदवीधर मतदारसंघाच्या आगामी निवडणुकीसाठी २३ ऑक्टोबर रोजी मतदान पार पडणार आहे. या निवडणुकीत एकही पात्र मतदार मतदानापासून वंचित राहू नये आणि प्रत्येकाला नियमानुसार आपला मतदानाचा हक्क बजावता यावा, यासाठी विविध माध्यमांद्वारे व्यापक स्वरूपात मतदार जनजागृती करण्यात यावी, असे स्पष्ट निर्देश निवडणूक निर्णय अधिकारी तथा विभागीय आयुक्त शीतल तेली-उगले यांनी दिले आहेत.

विभागीय आयुक्त कार्यालयात आयोजित समन्वय अधिकाऱ्यांच्या उच्चस्तरीय बैठकीत त्या बोलत होत्या. या बैठकीस अतिरिक्त आयुक्त तुषार ठोंबरे यांच्यासह विविध समन्वय अधिकारी उपस्थित होते, तर पाचही जिल्ह्यांतील संबंधित अधिकारी दूरदृष्यप्रणालीद्वारे (व्हिडिओ कॉन्फरन्सिंग) सहभागी झाले होते.

प्रमुख मुद्दे व निर्देश:

• मतदान पद्धतीची माहिती: मतदारांना मतदानासाठी वापरावयाचे पेन तसेच पसंतीक्रमानुसार (Preference Vote) मतदान करण्याची योग्य पद्धत याबाबत सविस्तर माहिती व मार्गदर्शन करावे.

• सुरळीत यंत्रणा व समन्वय: सर्व समन्वय अधिकाऱ्यांनी आपापल्या जिल्ह्यातील यंत्रणेशी सतत संपर्कात राहून निवडणूक प्रक्रिया पारदर्शक व सुरळीत पार पाडण्याबाबत दक्षता घ्यावी.

• प्रशिक्षण व व्यवस्थापन: मतदान आणि मतमोजणी प्रक्रियेशी संबंधित सर्व अधिकारी व कर्मचाऱ्यांसाठी योग्य प्रशिक्षणाचे आयोजन करावे. तसेच आवश्यक मनुष्यबळ नियोजन व साहित्याची पूर्तता करण्यावर भर द्यावा.

• आचारसंहितेचे पालन: निवडणूक विषयक कामकाज करताना आचारसंहितेच्या तरतुदी, भारत निवडणूक आयोगाच्या मार्गदर्शक सूचना आणि राज्य मुख्य निवडणूक अधिकाऱ्यांच्या संकेतस्थळावरील निर्देशांचे तंतोतंत पालन करावे.

या बैठकीत नामनिर्देशन पत्र दाखल करण्याची प्रक्रिया, मतमोजणी नियोजन, तक्रार निवारण, माध्यमे व खर्च नियंत्रण कक्ष, मतदान पूर्वतयारी आणि वाहतूक आराखड्याचा सविस्तर आढावा घेण्यात आला. प्रशासनाकडून निवडणुकीची तयारी वेगाने सुरू असून पात्र मतदारांनी या प्रक्रियेत सक्रिय सहभाग घ्यावा, असे आवाहन प्रशासनातर्फे करण्यात येत आहे.