राज्यात ७१ हजार रोजगाराची संधी; टाटा मोटर्स, महिंद्रा आणि गोदरेजसह अनेक दिग्गज कंपन्यांचा सहभाग
महाराष्ट्र २९ सप्टेंबर रोजी १,००० रोजगार मेळाव्यांचे आयोजन करणार असून, यामध्ये विविध क्षेत्रांतील प्रमुख कंपन्यांच्या सहभागातून ७१,९३९ रोजगाराच्या संधी उपलब्ध करून दिल्या जातील.
Eduvarta
एज्युवार्ता न्यूज नेटवर्क
राज्यातील युवकांना रोजगाराच्या विविध संधी उपलब्ध करून देण्यासाठी २९ सप्टेंबर रोजी एक हजार रोजगार मेळाव्यांचे आयोजन करण्यात येणार आहे. या मेळाव्यांत २ हजार ५०० हून अधिक उद्योगसमूह सहभागी होणार असून ७१ हजार ९३९ प् रोजगार संधी उपलब्ध होणार आहे. यामध्ये टाटा मोटर्स, महिंद्रा अँड महिंद्रा, गोदरेज एंटरप्रायझेस ग्रुप यांच्यासह अनेक नामांकित कंपन्या तरुणांना रोजगाराच्या संधी देणार आहेत. कौशल्य विकासमंत्री मंगल प्रभात लोढा यांनी ही माहिती दिली. पंडित दीनदयाळ उपाध्याय विश्वविक्रमी रोजगार महाकुंभाच्या माध्यमातून उद्योगांच्या मनुष्यबळ गरजा आणि युवकांची कौशल्ये यांची सांगड घालण्याचा प्रयत्न सुरू आहे.
आतापर्यंत या महाकुंभासाठी १ हजार ५८८ कंपन्यांनी नोंदणी केली असून त्यांच्यामार्फत ७१ हजार ९३९ प्राथमिक रोजगार संधी उपलब्ध होणार आहेत. टाटा मोटर्स, महिंद्रा अँड महिंद्रा, गोदरेज, एलआयसी, एचडीएफसी, आयसीआयसीआय, अॅक्सिस बँक, बजाज फायनान्स, मारुती सुझुकी, बॉश, एन्ड्युरन्स टेक्नॉलॉजीज, एशियन पेंट्स, जेएसडब्ल्यू स्टील, अल्ट्राटेक सिमेंट आणि सीएट यांसारख्या दिग्गज कंपन्या यात सहभागी आहेत. ऑटोमोबाईल, उत्पादन, बँकिंग, वित्तीय सेवा, आयटी, शिक्षण, आरोग्य आणि लॉजिस्टिक्स यासारख्या विविध क्षेत्रांतून संधी उपलब्ध करून देण्यात येत आहेत.
बारावी पास, आयटीआय, पदवी, डिप्लोमा, इंजिनीअरिंग तसेच इतर कौशल्याधारित पात्रता असलेल्या उमेदवारांसाठी तंत्रज्ञ, मशीन चालक, फिटर, इलेक्ट्रिशियन, मेकॅनिक आणि इतर पदांवर नोकऱ्या उपलब्ध असतील. शासनाशी संबंधित संस्थांमध्येही काम करण्याची संधी युवकांना मिळणार आहे. २९ सप्टेंबरपर्यंत नोंदणीकृत कंपन्यांची संख्या २ ५०० हून अधिक होण्याची अपेक्षा आहे.
आगामी काळात आणखी कंपन्या आणि उद्योगसंस्था सहभागी होणार असल्याने रोजगाराच्या संधींमध्ये वाढ होण्याची शक्यता आहे. हा उपक्रम युवकांना रोजगार मिळवून देण्यासोबतच उद्योगांना आवश्यक मनुष्यबळ पुरविण्यासाठी महत्त्वपूर्ण ठरणार आहे, असे मंत्री लोढा यांनी सांगितले.
