कामकाज सुधारा नाहीतर..! विभागीय शिक्षण उपसंचालक कार्यालयाला आयुक्तांची तंबी
शिक्षण विभागाच्या राज्यभरातील विविध कार्यालयांमधील कामकाज सुधारण्यासाठी शिक्षण आयुक्त सूरज मांढरे यांच्याकडून सातत्याने प्रयत्न केले जात आहेत. त्यासाठी ते संबंधित कार्यालयांना अचानक भेटीही देतात.
eduvarta@gmail.com 
एज्युवार्ता न्यूज नेटवर्क
शिक्षण विभागाच्या (Eduation Department) पुण्यातील (Pune) विभागीय उपसंचालक कार्यालयाच्या कामकाजाबाबत अनेकांकडून तक्रारी केल्या जात आहेत. विधीमंडळाच्या पावसाळी अधिवेशनातही या कार्यालयाचा काही अधिकाऱ्यांकडून विविध कामांसाठी लाच घेतली जात असल्याचा मुद्दा सदस्यांनी उपस्थित केला होता. यापार्श्वभूमीवर राज्याचे शिक्षण आयुक्त सूरज मांढरे (Education Commissioner Suraj Mandhare) यांनी गुरूवारी कार्यालयाला अचानक भेट दिली. यावेळी प्रामुख्याने पर्यवेक्षीय कामांमध्ये त्रुटी आढळून आल्याने त्यांनी अधिकाऱ्यांना चांगलेच फैलावर घेतल्याचे समजते.
शिक्षण विभागाच्या राज्यभरातील विविध कार्यालयांमधील कामकाज सुधारण्यासाठी शिक्षण आयुक्त सूरज मांढरे यांच्याकडून सातत्याने प्रयत्न केले जात आहेत. त्यासाठी ते संबंधित कार्यालयांना अचानक भेटीही देतात. गुरूवारी मांढरे यांनी पुण्यातील विभागीय शिक्षण उपसंचालक कार्यालयाला भेट देत कामकाजाचा आढावा घेतला. यावेळी कार्यालयातील अधिकारी व कर्मचाऱ्यांची भंबेरी उडाली.
‘नॅक’बाबत मंत्री चंद्रकांत पाटील थेट मंत्रालयात घेणार विद्यापीठांची ‘हजेरी’
आयुक्तांनी कार्यालयातील महत्वाची कागदपत्रे, फाईल्स, रजिस्टर तपासले. विविध प्रलंबित कामांची माहिती घेतली. या पाहणीदरम्यान पर्यवेक्षीय कामात त्रुटी आढळून आल्याचे समजते. त्यामुळे आयुक्तांनी कामकाजात सुधारणा करण्याची तंबी कार्यालयातील अधिकाऱ्यांना दिली आहे. त्यासाठी महिनाभराची मुदतही देण्यात आली आहे.
याविषयी बोलताना आयुक्त मांढरे म्हणाले, कनिष्ठ कार्यालयांच्या कामकाजा संदर्भात वेळोवेळी परिपत्रके काढली जातात. त्यावर अंमलबजावणी कशी सुरू आहे, हे पडताळणीसाठी वेळोवेळी भेटी दिल्या जातात. कालच्या भेटीत पर्यवेक्षकीय स्तरावरून कामकाजात अधिक सुधारणा होणे गरजेचे आहे, ही बाब दिसून आली. एक महिना मुदत दिली आहे. त्यानंतर योग्य ती कारवाई करण्यात येईल.
दरम्यान, आमदार राम सातपुते यांनी पावसाळी अधिवेशनामध्ये कार्यालयाचा मुद्दा उपस्थित केला होता. काही अधिकाऱ्यांची नावे घेत कार्यालयात विविध कामांसाठी पैसे घेतले जात असल्याचा आरोप केला होता. त्यावर शालेय शिक्षणमंत्री दीपक केसरकर यांनी तक्रारीची चौकशी केली जाईल, असे केसरकर यांनी म्हटले होते. त्यानंतर आता आयुक्तांनीच कार्यालयाची झाडाझडती घेतल्याने चर्चांना उधाण आले आहे.
शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.
