बीडमध्ये विद्यार्थी खरेदी-विक्रीचा महाघोटाळा; चंपावती विद्यालयात उत्तराखंडचे तीन बोगस विद्यार्थी आढळले
बीड जिल्ह्यातील खाजगी शिक्षण संस्थांमध्ये पटसंख्या फुगवून बोगस संचमान्यता मिळविण्यासाठी आणि शिक्षकांची पदे टिकवण्यासाठी विद्यार्थी खरेदी-विक्रीचा धक्कादायक महाघोटाळा उघडकीस आला आहे.
Eduvarta
एज्युवार्ता न्यूज नेटवर्क
बीड जिल्ह्यातील खाजगी शिक्षण संस्थांमध्ये पटसंख्या फुगवून बोगस संचमान्यता मिळविण्यासाठी आणि शिक्षकांची पदे टिकवण्यासाठी विद्यार्थी खरेदी-विक्रीचा धक्कादायक महाघोटाळा उघडकीस आला आहे. संस्थाचालक, मुख्याध्यापक आणि दलालांचे मोठे रॅकेट सक्रिय असल्याचे समोर आले असून यामुळे जिल्ह्यातील शिक्षण वर्तुळात खळबळ उडाली आहे. संचमान्यतेच्या काळात इतर राज्यांतील किंवा इंग्रजी माध्यमाच्या शाळांतील विद्यार्थ्यांचे यू-डायस आयडी वापरून कागदोपत्री प्रवेश दाखविले जातात. मंजुरी मिळाल्यानंतर हे विद्यार्थी पुन्हा मूळ शाळांकडे वर्ग केले जातात.
प्राथमिक शिक्षणाधिकारी जयश्री चव्हाण यांनी बीड येथील चंपावती विद्यालयास प्रत्यक्ष भेट देऊन चौकशी केली. या वेळी उत्तराखंडमधील यू-डायसवर नोंद असलेल्या तीन विद्यार्थ्यांचे बनावट प्रवेश दाखविल्याचे निष्पन्न झाले. हे विद्यार्थी केवळ कागदावरच अस्तित्वात होते. या गंभीर गैरप्रकाराचा गोपनीय अहवाल शिक्षणाधिकाऱ्यांनी थेट पुणे शिक्षण आयुक्तांकडे सादर केला आहे. त्यामुळे बोगस संस्थाचालक आणि दलालांचे धाबे दणाणले आहेत.
ऑगस्ट ते सप्टेंबर या संचमान्यतेच्या कालावधीत अशा प्रकारे पटसंख्या फुगवली जाते. त्यामुळे शिक्षकांची अतिरिक्त पदे टळतात आणि नवीन बोगस तुकड्या मंजूर करून घेता येतात. बीड जिल्ह्यात या रॅकेटने मोठ्या प्रमाणात मुळे पसरविली आहेत. संस्थाचालक आणि एजंट यांच्या संगनमताने हा प्रकार वर्षानुवर्षे सुरू असल्याचे आरोप आहेत. चंपावती विद्यालयातील प्रकरणानंतर शिक्षणाधिकाऱ्यांनी तात्काळ सखोल तपासणी सुरू केली आहे.
या चौकशीमुळे बीडच्या शिक्षण क्षेत्रात मोठी खळबळ उडाली आहे. लेखी अहवाल वरिष्ठ पातळीवर पाठविण्यात आला असून पुढील कारवाईची शक्यता वर्तविली जात आहे. या महाघोटाळ्याविरोधात भ्रष्टाचार निर्मूलन समितीचे राज्य अध्यक्ष इंजिनियर सादिक इनामदार यांनी आक्रमक पाठपुरावा सुरू केला आहे. त्यांनी मुख्यमंत्री, शालेय शिक्षण प्रधान सचिव आणि शिक्षण आयुक्त पुणे यांच्याकडे तक्रार केली आहे.
या प्रकरणाने संपूर्ण जिल्ह्यातील खाजगी शाळांमधील संचमान्यता प्रक्रियेवर प्रश्नचिन्ह निर्माण झाले आहे. विद्यार्थी खरेदी-विक्रीसारख्या प्रकारांमुळे खऱ्या विद्यार्थ्यांचे आणि शिक्षकांचे हित बाधित होत असल्याचे सांगितले जात आहे. शिक्षण विभागाने आता कठोर कारवाई करण्याची गरज असल्याची मागणी होत आहे. या घोटाळ्याची पूर्ण चौकशी होऊन दोषींवर कारवाई व्हावी, अशी अपेक्षा व्यक्त केली जात आहे.
