सीईटी सेल : बीएड प्रवेशाची तिसरी यादी जाहीर; २३ हजार ८८७ विद्यार्थ्यांना प्रवेशाची संधी

एज्युवार्ता न्यूज नेटवर्क 

महाराष्ट्र राज्य सामाईक प्रवेश परीक्षा कक्षातर्फे शैक्षणिक वर्ष २०२६-२७ साठी बॅचलर ऑफ एज्युकेशन (बीएड) अभ्यासक्रमाच्या केंद्रीभूत प्रवेश प्रक्रियेची तिसरी यादी जाहीर करण्यात आली आहे. या फेरीत राज्यातील ४७७ बीएड महाविद्यालयांमध्ये उपलब्ध असलेल्या २६ हजार १८७ जागांपैकी २३ हजार ८८७ विद्यार्थ्यांना प्रवेशाची संधी मिळाली आहे. तिसऱ्या फेरीसाठी एकूण ४१ हजार ९९८ विद्यार्थ्यांनी महाविद्यालयांचे पसंतीक्रम नोंदविले होते.

राज्यात बीएड अभ्यासक्रमाच्या प्रवेशासाठी एकूण ६५ हजार ५३४ विद्यार्थ्यांनी नोंदणी केली होती. त्यापैकी निर्धारित मुदतीत ४१ हजार ९९८ विद्यार्थ्यांनी महाविद्यालयांचे पसंतीक्रम भरले. त्यामुळे तिसऱ्या केंद्रीय प्रवेश फेरीसाठी या विद्यार्थ्यांचाच विचार करण्यात आला. राज्यातील ४७७ महाविद्यालयांमध्ये प्रवेशासाठी २६ हजार १८७ जागा उपलब्ध होत्या. त्यापैकी २३ हजार ८८७ विद्यार्थ्यांना विविध पसंतीक्रमांनुसार महाविद्यालयांचे वाटप करण्यात आले आहे.

दरम्यान, यापूर्वी पार पडलेल्या पहिल्या प्रवेश फेरीत ७ हजार ३८३, तर दुसऱ्या फेरीत २ हजार ४२५ विद्यार्थ्यांनी बीएड महाविद्यालयांमध्ये प्रवेश घेतला आहे. आता तिसऱ्या फेरीतील महाविद्यालय वाटपानंतर प्रवेश प्रक्रियेला वेग येण्याची अपेक्षा आहे.

१३ ऑक्टोबरपर्यंत प्रवेश निश्चित करणे आवश्यक

तिसऱ्या फेरीत महाविद्यालय मिळालेल्या विद्यार्थ्यांनी १३ ऑक्टोबर २०२६ पर्यंत संबंधित महाविद्यालयात प्रत्यक्ष उपस्थित राहून आवश्यक कागदपत्रे सादर करणे आणि निर्धारित शुल्क भरून प्रवेश निश्चित करणे आवश्यक आहे. त्यानंतर १४ ऑक्टोबर २०२६ रोजी रिक्त जागांची माहिती जाहीर करण्यात येणार आहे. त्यामुळे प्रवेश मिळालेल्या विद्यार्थ्यांनी दिलेल्या मुदतीत प्रवेशाची प्रक्रिया पूर्ण करावी, असे आवाहन करण्यात येत आहे.