आयुष अभ्यासक्रमांच्या पहिल्या फेरीत १० हजाराहून अधिक विद्यार्थ्यांना प्रवेश
आयुर्वेद (बीएएमएस) अभ्यासक्रमासाठी ११३ महाविद्यालयांतील ७ हजार ६८९ जागांपैकी ७ हजार ५४६ जागांचे वाटप पूर्ण झाले. यामध्ये १६ शासकीय महाविद्यालयांतील १ हजार १५७ आणि ९७ खासगी महाविद्यालयांतील ६ हजार ३८९ जागांचा समावेश आहे.
Eduvarta
एज्युवार्ता न्यूज नेटवर्क
राज्यातील आयुर्वेद, होमिओपॅथी आणि युनानी या आयुष वैद्यकीय अभ्यासक्रमांच्या केंद्रीभूत प्रवेश प्रक्रियेची पहिली जागावाटप यादी सोमवारी जाहीर झाली. या फेरीत एकूण १६६ आयुष महाविद्यालयांमधील ११ हजार २७२ जागांपैकी १० हजार ५१९ विद्यार्थ्यांना प्रवेशाची संधी मिळाली आहे. उर्वरित ७५३ जागा पुढील फेरीसाठी राखीव ठेवण्यात आल्या आहेत. या वाटपात बीएएमएस अभ्यासक्रमाचा वाटा सर्वाधिक राहिला.
आयुर्वेद (बीएएमएस) अभ्यासक्रमासाठी ११३ महाविद्यालयांतील ७ हजार ६८९ जागांपैकी ७ हजार ५४६ जागांचे वाटप पूर्ण झाले. यामध्ये १६ शासकीय महाविद्यालयांतील १ हजार १५७ आणि ९७ खासगी महाविद्यालयांतील ६ हजार ३८९ जागांचा समावेश आहे. या अभ्यासक्रमाच्या केवळ १४३ जागा रिक्त राहिल्या. होमिओपॅथी (बीएचएमएस) अभ्यासक्रमात ४८ महाविद्यालयांतील ३ हजार ३३३ जागांपैकी २ हजार ७२७ जागांचे वाटप झाले. दोन शासकीय महाविद्यालयांमध्ये १३४ तर ४६ खासगी महाविद्यालयांमध्ये २ हजार ५९३ विद्यार्थ्यांना प्रवेश मिळाला. यात ६०६ जागा रिक्त आहेत.
युनानी (बीयुएमएस) अभ्यासक्रमात मात्र जवळपास सर्व जागा भरल्या गेल्या. पाच महाविद्यालयांतील २५० जागांपैकी २४६ जागा वाटल्या गेल्या आणि फक्त चार जागा रिक्त राहिल्या. दोन शासकीय महाविद्यालयांतील सर्व १०२ जागा पूर्ण भरल्या असून तीन खासगी महाविद्यालयांतील १४८ पैकी १४४ जागांचे वाटप झाले. यातून युनानी अभ्यासक्रमातील मागणी स्पष्ट दिसून येते.
पहिल्या फेरीत महाविद्यालय मिळालेल्या विद्यार्थ्यांनी २८ सप्टेंबर ते १ ऑक्टोबर २०२६ रोजी सायंकाळी ५.३० वाजेपर्यंत संबंधित महाविद्यालयात प्रत्यक्ष उपस्थित राहून प्रवेश निश्चित करावा. त्यासाठी मूळ कागदपत्रे व शुल्काचा डिमांड ड्राफ्ट सादर करणे आवश्यक आहे. वेळेत प्रवेश न घेतल्यास जागा रद्द होऊ शकते. पुढील फेरीत रिक्त जागांसाठी पुन्हा संधी उपलब्ध होईल.
