SPPU NEWS : नशा मुक्त कॅम्पससाठी विद्यार्थ्यांचे आंदोलन

एज्युवार्ता न्यूज नेटवर्क 

सावित्रीबाई फुले पुणे विद्यापीठ (Savitribai Phule Pune University)प्रशासनाने ' नशा मुक्त कॅम्पस ' या अभियानाची विद्यापीठात व संलग्न महाविद्यालयात प्रभावी अंमलबजावणी करावी. नवीन कार्यक्षम सुरक्षा यंत्रणा (Efficient security system)नियुक्त करण्यात यावी. विद्यापीठातील दलित , आदिवासी व बहुजन विद्यार्थी , (Dalit, tribal and Bahujan students)शिक्षक व शिक्षेकेतर कर्मचारी यांना जाणीवपूर्वक लक्ष करण्याच्या कृत्यावर नियंत्रण व प्रतिबंधात्मक कारवाई करण्यात यावी. विद्यापीठाला वर्षभराहून अधिक कालावाढीपासून पुर्णवेळ कुलसचिव (Full Time Registrar)नाहीत.त्यामुळे विद्यापीठ प्रशासनाने तात्काळ पुर्णवेळ कुलसचिव पद भरावे,यांसह विविध मागण्यांसाठी विद्यार्थी संघटनांतर्फे विद्यापीठाच्या मुख्य इमारतीसमोर आंदोलन करण्यात आले.

विद्यार्थ्यांच्या मागण्यांसाठी विद्यापीठात आंबेडकरी चळवळीतील विद्यापीठ विद्यार्थी संघर्ष कृती समितीचे रोहीत भाबरे , मयुर जावळे , रिपब्लिकन बहुजन विद्यार्थी परिषदेचे (A) सुरज गायकवाड, सचिन बनसोडे, डॉ. बाबासाहेब आंबेडकर पोस्ट ग्रॅज्युएट स्टुडन्ट असोसिएशनचे अमोल सरोदे, सागर सोनकांबळे, दलित पँथरचे प्रकाश माघाडे , राष्ट्रीय विद्यार्थी काँग्रेसचे अक्षय कांबळे, सुशांत दसाडे आदी संघटना व त्यांचे प्रतिनिधी उपस्थित होते .

दरम्यान आंदोलक विद्यार्थी प्रतिनिधींच्या ६ जणांच्या शिष्टमंडळाने मा. कुलगुरू व प्र. कुलगुरू यांच्याशी संवाद साधला.या बैठकीत सर्व विद्यार्थी प्रश्नांवर सविस्तर चर्चा करण्यात आली आहे. कायमस्वरूपी कुलसचिव नियुक्त करण्यासंबंधी राज्यपाल कार्यालयाशी विद्यापीठ प्रशासन पत्र व्यवहार करत आहे,अशी माहिती चर्चेदरम्यान कुलगुरूंनी दिली. सोबतच लवकरात नशा मुक्त अभियान राबवले जाणार आहे. विद्यापीठातील दलित आदिवासी बहुजन विद्यार्थी प्राध्यापक यांच्यावर होणाऱ्या अन्यायासंदर्भात तक्रार प्राप्तीनंतर कठोर कारवाई करण्याचे आश्वासन कुलगुरूंनी दिले आहे. विद्यापीठ प्रशासनाच्या लेखी पत्र व्यवहारानंतर सर्व संघटनांनी आंदोलन केले आहे. येणाऱ्या काळामध्ये या सर्व मागण्या पूर्ण झाल्या नाहीत तर पुन्हा एकदा तीव्र स्वरूपाचे आंदोलन आंबेडकरी चळवळीच्या वतीने करण्यात येईल. असा इशारा देखील विद्यापीठ प्रशासनाला देण्यात आला. 

---------------------------------

विविध विद्यार्थी प्रश्नासंबंधी सर्व आंबेडकरी पक्ष व विद्यार्थी संघटनांच्या वतीने आज विद्यापीठात तीव्र आंदोलन करण्यात आले आहे. पुर्णवेळ कुलसचिव , नशा मुक्त कॅम्पस , कार्यक्षम सुरक्षा यंत्रणा व दलित आदिवासी व बहुजन विद्यार्थी शिक्षक शिक्षकेतर कर्मचाऱ्यांना जाणीवपूर्वक त्रास देण्याच्या घटना, वसतिगृह निर्मिती इ. विविध प्रश्नांवर आवाज उठवण्याचे काम आम्ही केले. येणाऱ्या काळात आंबेडकरी विचारधाराचे पक्ष संघटना विद्यापीठ प्रशासनाच्या चुकीच्या धोरणावर प्रभावीपणे आवाज उठवण्याचे काम करणार आहेत. 
- राहुल ससाणे,अध्यक्ष, विद्यापीठ विद्यार्थी संघर्ष कृती समिती 

-----------------

विद्यापीठाचा कॅम्पस हे भयमुक्त व नशामुक्त असावे, अशी आमच्या पक्षाची व विद्यार्थी संघटनेची आग्रही मागणी आहे. कॅम्पस मध्ये हिंसाचार होऊ नये यासाठी विद्यापीठ प्रशासनाने कार्यक्षम सुरक्षा यंत्रणा नियुक्त करावी. विद्यापीठात प्रवेश घेतलेल्या प्रत्येक गरजू विद्यार्थ्यांना हॉस्टेल उपलब्ध करून द्यावे. 

-सुरज गायकवाड,  अध्यक्ष - रिपब्लिकन बहुजन विद्यार्थी परिषद 

---------------------------------------------

कुलगुरू व प्र. कुलगुरू यांच्याशी चर्चा करण्यासाठी गेलेल्या शिष्टमंडळामध्ये विद्यार्थी प्रतिनिधी म्हणून मी उपस्थित होतो. निवेदनामध्ये देण्यात आलेल्या सर्व विद्यार्थी मागण्यांवर कुलगुरू महोदय यांच्याशी सविस्तर चर्चा केली. कुलगुरू यांनी या संदर्भात सकारात्मक भूमिका घेण्याचे लेखी आश्वासन दिले आहे. 

-रोहित भामरे - शिष्टमंडळ सदस्य