SPPU विद्यापीठातील 'त्या' घटनेची उच्चस्तरीय चौकशी; न्यायाधीशांची समिती, रात्री उशीरा काय घडले ?
विद्यापीठात घडलेल्या या घटनेमुळे विद्यार्थिनींच्या सुरक्षिततेचा प्रश्न ऐरणीवर आला. रात्रीच्या वेळी घडलेल्या या घटनेमागील नेमकी कारणे काय आहेत, संबंधित परिस्थिती कशी निर्माण झाली आणि सुरक्षाव्यवस्थेत काही त्रुटी होत्या का, याबाबत चौकशी होण्याची शक्यता आहे.
Eduvarta
एज्युवार्ता न्यूज नेटवर्क
सावित्रीबाई फुले पुणे विद्यापीठातील मुलींच्या वसतिगृहात रात्री उशिरा घडलेल्या घटनेची उच्चस्तरीय चौकशी करण्यात येणार असल्याची माहिती विश्वसनीय सूत्रांकडून मिळत आहे. विद्यापीठाने या प्रकरणाची गांभीर्याने दखल घेत माजी न्यायाधीशांच्या अध्यक्षतेखाली चौकशी समिती स्थापन करण्याच्या हालचाली सुरू असल्याचे समजते.त्यामुळे मुलींच्या सुरक्षेबाबत निर्माण झालेल्या प्रश्नांचा सखोल तपास केला जाणार आहे.
विद्यापीठाच्या परिसरात दोन मुलांनी हॉस्टेलमधील विद्यार्थीनीशी गैरवर्तन केले होते.त्यामुळे विद्यापीठात रात्री उशीरा आंदोलन झाले होते. विद्यापीठात घडलेल्या या घटनेमुळे विद्यार्थिनींच्या सुरक्षिततेचा प्रश्न ऐरणीवर आला. रात्रीच्या वेळी घडलेल्या या घटनेमागील नेमकी कारणे काय आहेत, संबंधित परिस्थिती कशी निर्माण झाली आणि सुरक्षाव्यवस्थेत काही त्रुटी होत्या का, याबाबत चौकशी होण्याची शक्यता आहे.
प्रस्तावित समितीच्या माध्यमातून घटनेशी संबंधित सर्व बाबींची सखोल तपासणी करून वस्तुस्थिती समोर आणण्यावर भर दिला जाण्याची शक्यता आहे. तसेच विद्यापीठातील मुलींच्या वसतिगृहांची सुरक्षा, रात्रीच्या वेळी असलेली देखरेख आणि आपत्कालीन परिस्थितीत करण्यात येणाऱ्या उपाययोजनांचाही आढावा घेतला जाऊ शकतो.तसेच विद्यापीठातील अपुरी आणि नादुरूस्त असलेली सीसीटीव्हीची यंत्रणा लवकरच कार्यान्वित केली जाणार असल्याचेही सूत्रांनी सांगितले.
दरम्यान, माजी न्यायाधीशांच्या अध्यक्षतेखाली समिती स्थापन करण्याबाबत विद्यापीठ प्रशासनाकडून अधिकृत घोषणा झाल्याची पुष्टी अद्याप झालेली नाही.परंतु, लवकरच याबाबतचे अधिकृत पत्र प्रसिद्ध केले जाणार असल्याचे विश्वसनीय सूत्रांनी सांगितले. त्यामुळे समितीची स्थापना, तिचे कार्यक्षेत्र आणि चौकशीचा कालावधी याबाबत अधिकृत निर्णयानंतरच स्पष्टता येणार आहे.
