यंदा इंजिनिअरिंग अभ्यासक्रमासाठी विक्रमी नोंदणी, प्रवेशाचा कट-ऑफ वाढणार.. 

एज्युवार्ता न्यूज नेटवर्क

शैक्षणिक वर्ष २०२५-२६ (Academic year 2025-26) साठी महाराष्ट्र राज्य सामाईक प्रवेश परीक्षा (Maharashtra State Common Entrance Examination) कक्षामार्फत राबवण्यात येणाऱ्या इंजिनिअरींग अभ्यासक्रमासाठी (Engineering courses) गत वर्षीच्या तुलनेत यंदा विक्रमी नोंदणी (Record registration) झाली आहे. त्यामुळे प्रवेशासाठी विद्यार्थ्यांची मोठी चुरस पाहायला मिळणार, असून त्याचा कट-ऑफ देखील वाढण्याची शक्यता वर्तवण्यात येत आहे. इंजिनिअरिंग अभ्यासक्रमाच्या प्रवेशाच्या कॅप फेरीसाठी नोंदणीला २८ जूनपासून सुरुवात केली होती. त्याची मुदत सोमवारी संपुष्टात आली. यामध्ये मागील काही वर्षाच्या तुलनेत यंदा विक्रमी अशी २ लाख १४ हजार विद्यार्थ्यांनी नोंदणी केली आहे.

SPPU : इंजिनिअरिंग २०१९ पॅटर्न विद्यार्थ्यांचे Re-Exam साठी आंदोलन; NSUI आक्रमक

यंदा इंजिनिअरिंग अभ्यासक्रमाला सुगीचे दिवस येण्याची चिन्हे असून, कॉलेजांतील रिक्त जागा भरल्या जाण्याची शक्यता वर्तविली जात आहे. गेल्या वर्षी इंजिनिअरिंग अभ्यासक्रमाच्या प्रवेशासाठी १ लाख ९२ हजार विद्यार्थ्यांनी नोंदणी केली होती, तर प्रवेशासाठी १ लाख ८० हजार १७० जागा उपलब्ध होत्या. या जागांवर १ लाख ४९ हजार ७८ विद्यार्थ्यांनी प्रवेश घेतले होते. त्यातून तब्बल ३१ हजार जागा रिक्त राहिल्या होत्या, तर २०२३-२४ मध्ये ४० हजार ५४८ जागा रिक्त राहिल्या होत्या.

मागील काही वर्षात इंजिनिअरिंगच्या रिक्त जागांचे प्रमाण वाढले होते. त्यातून कॉलेजांना विद्यार्थी मिळत नसल्याची स्थिती होती. त्यातून विद्यार्थ्यांअभावी अनेक कॉलेजांवर काही अभ्यासक्रम चालविणेही अवघड होऊन बसले होते. यंदा विद्यार्थ्यांची नोंदणी वाढल्याने प्रवेशात वाढीची कॉलेजांना आशा आहे. त्यामध्ये सर्वाधिक पसंती असलेल्या कॅम्प्युटर आणि त्यासंबंधीच्या शाखांकडे विद्यार्थ्यांचा ओढा यंदाही अधिक राहणार असून, या अभ्यासक्रमाच्या प्रवेशासाठी स्पर्धा तीव्र होण्याची चिन्हे आहे.