विद्यार्थ्यांच्या पुरवणी परीक्षेच्या मागणीवर विद्यापीठ सकारात्मक 

एज्युवार्ता न्यूज नेटवर्क 

सावित्रीबाई फुले पुणे विद्यापीठाकडे गेल्या काही दिवसांपासून इंजिनिअरिंगचे विद्यार्थी कॅरीऑन किंवा पुरवणी परीक्षेची मागणी करत आहेत. सोमवारी हजारोंच्या संख्येने विद्यार्थ्यांनी विद्यापीठात एकत्र येऊन तीव्र आंदोलन केले. त्यावर विद्यापीठ प्रशासन काहीसे सकारात्मक असल्याचे दिसत असून याबाबत कायदेशीर बाबी तपासून विद्यार्थी हिताचा निर्णय घेतला जाईल,असे विद्यापीठ प्रशासनातर्फे स्पष्ट केले जात आहे.

इंजिनिअरिंगच्या 2009 पॅटर्नच्या विद्यार्थ्यांबाबत एन एस यु आय या संघटनेच्या माध्यमातून वेळोवेळी सावित्रीबाई फुले पुणे विद्यापीठाला निवेदन देण्यात आले. विद्यार्थ्यांचे शैक्षणिक वर्ष वाया जात असल्यामुळे विद्यापीठाने या विद्यार्थ्यांबाबत सकारात्मक निर्णय घ्यावा, अशी मागणी विद्यापीठाकडे करण्यात आली. त्यावर विद्यापीठ प्रशासन सकारात्मक असल्याचे दिसून येत आहे. विद्यापीठाचे कुलगुरू डॉ.सुरेश गोसावी व परीक्षा व मूल्यमापन मंडळाचे  प्रभारी संचालक डॉ.प्रभाकर देसाई यांनी यासंदर्भात प्रतिक्रिया दिल्या आहेत.

विद्यापीठाचे प्रभारी संचालक डॉ. प्रभाकर देसाई म्हणाले, सावित्रीबाई फुले पुणे विद्यापीठातील काही विद्यार्थ्यांनी कॅरीऑन किंवा पुरवणी परीक्षेसंदर्भात निवेदने सादर केली आहेत. जे विद्यार्थी अशी मागणी करत आहेत, ते सर्व विद्यार्थी त्या त्या वर्षात किमान 50 टक्के श्रेयांक प्राप्त करू शकलेले नाहीत. परिणामी विद्यापीठ नियमानुसार हे सर्व विद्यार्थी त्या त्या शैक्षणिक वर्षात अनुत्तीर्ण झाले आहेत. त्यांच्या मागणीसंदर्भात विद्यार्थीहिताच्या दृष्टीने विचार करून यासंदर्भातील कायदेशीर बाबी तसेच संबंधित शिखर संस्थांच्या मार्गदर्शनानुसार पुढील कार्यवाही करण्यात येईल.

------------------------------------

विद्यापीठ प्रशासन नेहमीच विद्यार्थी हाच केंद्रबिंदू मानून विद्यार्थी हिताचे निर्णय घेत असते. विद्यापीठाने ह्याही अगोदर विशिष्ट परिस्थितीत विद्यार्थ्यांचे वर्ष वाया जाणार नाही, असे निर्णय घेतले आहेत. ह्यावेळीही ह्यासंदर्भात कायदेशीर सल्ला घेऊन आणि नियमांच्या अधीन राहून निर्णय घेतला जाईल.

- डॉ. सुरेश गोसावी, कुलगुरू,सावित्रीबाई फुले पुणे विद्यापीठ