TJ कॉलेजमध्ये 'बीएस्सी डेटा सायन्स' अभ्यासक्रम सुरू;10 गुणवंत विद्यार्थ्यांना शिष्यवृत्ती
औद्योगिक कंपन्यांमध्ये काम करण्यासाठी लागणारा अभ्यासक्रम महाविद्यालयात शिकवला जावा आणि कंपन्यांना त्यांच्या आवश्यकतेनुसार कुशल मनुष्यबळ उपलब्ध करून द्यावे,हा दृष्टीकोन समोर ठेवून महाविद्यालयाने बीएस्सी इन डेटा सायन्स हा पदवी अभ्यासक्रम सुरू करण्याचा निर्णय घेतला आहे.
eduvarta@gmail.com 
एज्युवार्ता न्यूज नेटवर्क
पुणे: खडकी शिक्षण संस्था (Khadki Educational Institute)संचालित टिकाराम जगन्नाथ महाविद्यालयाला (TJ College) स्वायत्तता मिळाली असून महाविद्यालयातर्फे 2025-26 या शैक्षणिक वर्षापासून बीएस्सी इन डेटा सायन्स (BSc Data Science course)हा अभ्यासक्रम सुरू करण्यात आला आहे.या अभ्यासक्रमास प्रवेश घेणाऱ्या 10 गुणवंत व गरजू विद्यार्थ्यांची निवड करून त्यांना शिष्यवृत्ती दिली जाणार आहे. महाविद्यालयाने नामांकित कंपन्याबरोबर करार केला असून विद्यार्थ्यांना १०० टक्के इंटर्नशीप व प्लेसमेट देण्यात येणार आहे, असे महाविद्यालयाचे प्राचार्य डॉ. संजय चाकणे यांनी सांगितले.
खडकी हे पुणे व पिंपरी- चिंचवड या दोन्ही महानगरपालिकांच्या मध्यवर्ती ठिकाणी आहे. चाकण, भोसरी, हिंजवडी या पिंपरी-चिंचवड परिसरातील आणि पुण्यातील खराडी- विमान नगर या भागातील आयटी कंपन्यामध्ये डेटा सायन्सशी निगडीत रोजगाराच्या मोठ्या संधी उपलब्ध आहेत.महाविद्यालयाला स्वायत्तता मिळाल्यामुळे औद्योगिक कंपन्यांबरोबर सामंजस्य करार करून रोजगाराभिमुख अभ्यासक्रम सुरू करणे शक्य झाले आहे.त्यामुळे औद्योगिक कंपन्यांमध्ये काम करण्यासाठी लागणारा अभ्यासक्रम महाविद्यालयात शिकवला जावा आणि कंपन्यांना त्यांच्या आवश्यकतेनुसार कुशल मनुष्यबळ उपलब्ध करून द्यावे,हा दृष्टीकोन समोर ठेवून महाविद्यालयाने बीएस्सी इन डेटा सायन्स हा पदवी अभ्यासक्रम सुरू करण्याचा निर्णय घेतला आहे.
महाविद्यालयाच्या विद्या परिषदेमध्ये बीएस्सी इन डेटा सायन्स या अभ्यासक्रमास मान्यता घेण्यात आली आहे. या अभ्यासक्रमाच्या प्रवेश प्रक्रियेला सुरूवात झाली असून कला, वाणिज्य व विज्ञान या तीनही शाखेचे विद्यार्थी प्रवेश घेऊ शकतात. महाविद्यायात प्रवेशासाठी मर्यादित जागा उपलब्ध असून विद्यार्थ्याना माफक शुल्कात प्रवेश दिला जाणार आहे. विद्यापीठ अनुदान आयोगाने इयत्ता बारावीनंतर एकाचवेळी ड्युअल डिग्री करण्यास परवानगी दिली आहे.त्यामुळे इतर महाविद्यलायात प्रवेश घेतलेल्या विद्यार्थ्यांना सुद्धा ड्युअल डिग्री प्रोग्राम अंतर्गत बीएस्सी इन डेटा सायन्स या अभ्यासक्रमास प्रवेश घेता येईल. प्रवेशाबाबत अधिक माहिती जाणून घेण्यासाठी विद्यार्थी व पालकांनी टिकाराम जगन्नाथ महाविद्यालयाच्या संकेतस्थळाला भेट द्यावी, असे आवाहन महाविद्यालयाचे प्रा. डॉ.संजय चाकणे यांनी केले आहे.
अभ्यासक्रमासंबंधित अधिक माहितीसाठी भेट द्या - https://tjcollege.org/
