SPPU विद्यापीठात विद्यार्थ्यांमध्ये हाणामारी; सुरक्षा रक्षकालाही बसला बेल्टाचा फटका 

एज्युवार्ता न्यूज नेटवर्क 

सावित्रीबाई फुले पुणे विद्यापीठातील तंत्रज्ञान विभागातील विद्यार्थ्यांमधील वादावरून कमरेच्या बेल्टने हाणामारी झाल्याची धक्कादायक घटना समोर आली आहे. फ्रेशर्स पार्टी ठेवण्याच्या नियोजनातील चर्चेवरून निर्माण झालेल्या वादातून ही हाणामारी झाल्याचे बोलले जात आहे. त्यामुळे विद्यार्थ्यांच्या सुरक्षिततेचा प्रश्न पुन्हा एकदा ऐरणीवर आला आहे. दरम्यान, हाणामारी झाली त्या ठिकाणी सीसीटीव्ही कॅमेरे नसल्याने याबाबतचे कोणतेही पुरावे उपलब्ध नसल्याचे विद्यार्थ्यांकडून सांगितले जात आहे. 

सावित्रीबाई फुले पुणे विद्यापीठात विविध विभागात विद्यार्थ्यांनी प्रथम वर्षाच्या अभ्यासक्रमांना प्रवेश घेतला आहे. तंत्रज्ञान विभागातील विद्यार्थ्यांनी प्रथम वर्षाच्या विद्यार्थ्यांसाठी फ्रेशर्स पार्टीचे आयोजन करण्यासंदर्भात चर्चा सुरू होती. एका विद्यार्थिनीने याबाबत सोशल मीडियावर एसएमएस टाकला. त्यावर दुसऱ्या एका विद्यार्थ्याने वाद निर्माण होईल, असे वक्तव्य केले. तसेच विद्यार्थिनीला शिवीगाळ केली.त्यातून दोन विद्यार्थ्यांमध्ये शाब्दिक चकमक झाली.

शिवीगाळ केल्याचा जाब एका विद्यार्थ्याने विचारल्यानंतर संबंधित विद्यार्थ्यांमध्ये वाद निर्माण झाला.त्यातील एक विद्यार्थी सेवक वसाहतीत राहत आहे. त्याने आपल्या मित्रांना विद्यापीठाच्या वसतिगृहाजवळ बोलावले तसेच वाद घालणाऱ्या मुलाला वसतिगृहाजवळ शिवीगाळ करून बेल्टने मारहाण केली. तसेच कोयते काढा अशीही आरडाओरड येथे झाली. या ठिकाणी सेवेस असणाऱ्या सुरक्षा रक्षकाने भांडणे थांबवण्यासाठी मध्यस्थी केली. त्यावेळी त्यालाही बेल्टाचा एक फटका बसला. त्यामुळे विद्यार्थ्यांनी कुलगुरू कार्यालयाच्या दारात ठिय्या मांडला. त्यानंतर कुलगुरू यांनी विद्यार्थ्यांच्या शिष्टमंडळाबरोबर चर्चा केली. तसेच विद्यार्थी व सुरक्षा विभाग या दोघांकडून पोलिसांकडे तक्रार देण्यासाठी विद्यार्थी पोलीस स्टेशनकडे गेले, असे विद्यार्थ्यांनी सांगितले.

विद्यापीठातील कर्मचाऱ्यांच्या मुलांमुळे हा वाद निर्माण झाला असल्याचे प्रथम दर्शनी दिसून येत आहे. मात्र, पोलीस तपासानंतरच सर्व बाबी समोर येतील, असे बोलले जात आहे.