परदेश शिष्यवृत्तीसाठी करा 'या' तारखेपर्यंत अर्ज; वाचा संपूर्ण प्रक्रिया

एज्युवार्ता न्यूज नेटवर्क

राज्यातील अल्पसंख्याक समुदायातील विद्यार्थ्यांना (Students belonging to minority communities) २०२४-२५ वर्षात परदेशात विशेष अध्ययन (Special study abroad) करण्यासाठी ‘परदेश शिष्यवृत्ती योजने’अंतर्गत (Overseas Scholarship Scheme) पात्र विद्यार्थ्यांकडून अर्ज मागवण्यात (applications from students) येत असून विद्यार्थ्यांनी अर्ज सादर करण्याचे आवाहन समाज कल्याण विभागाच्या (Department of Social Welfare) वतीने करण्यात आले आहे.

परदेशात उच्च शिक्षणासाठी पदव्युत्तर पदवी व पी.एच.डी.च्या अभ्यासक्रमासाठी राज्यातील धार्मिक अल्पसंख्याक विद्यार्थ्यांकडून अर्ज मागवण्यासाठी शासनाच्या अल्पसंख्याक विभागाने मंजुरी दिली आहे. याबाबत शासनाच्या https://www.maharashtra.gov.in/ या संकेतस्थळावर विस्तृत जाहिरात प्रसिद्ध करण्यात आलेली आहे. उमेदवार अर्ज सादर करण्यासाठी ६ सप्टेंबरपर्यंत अर्ज करू शकतात.

या योजनेसाठी अर्ज करणारा  विद्यार्थी हा केंद्र अथवा महाराष्ट्र शासनाने धार्मिक अल्पसंख्याक म्हणून घोषित केलेल्या समुदायातील व महाराष्ट्र राज्याचा रहिवासी असावा. यासाठी पदव्युत्तर पदवी अभ्यासक्रमास ३५ वर्ष व पीएचडीसाठी ४० वर्ष ही कमाल वयोमर्यादा असणार आहे. तसेच विद्यार्थ्यांच्या कुटुंबाचे एकत्रित वार्षिक उत्पन्न रु.८.०० लक्ष इतके मर्यादित असावे. परदेशातील शिक्षण संस्था ही जागतीक क्रमवारीत (QS World University Rank) २०० च्या आत असावी. परदेशातील पदव्युत्तर पदवी किंवा पदव्युत्तर पदविका अभ्यासक्रमासाठी प्रवेश घेतलेल्या विद्यार्थ्यांने भारतातील मान्यताप्राप्त विद्यापीठांमधून किमान ५५% गुणांसहित पदवी परीक्षा उतीर्ण केलेली असावी. पीएचडी अभ्यासक्रमासाठी प्रवेश घेतलेल्या विद्यार्थ्यांने भारतातील मान्यताप्राप्त विद्यापीठांमधून किमान ५५% गुणांसहित पदव्युत्तर पदवी परीक्षा उतीर्ण केलेली असावी. निवडीसंदर्भातील अन्य अटी व शर्ती ह्या जाहिराती मध्ये नमूद केल्यानुसार व संबंधित शासन निर्णयानुसार लागू राहणार आहे. 

परदेशातील शैक्षणिक संस्थेने Offer Letter मध्ये नमूद केलेल्या शैक्षणिक कालावधीसाठी लागू केलेली संपूर्ण शिक्षण फी, अभ्यासक्रमासाठी नजीकच्या मार्गांनी Economy Class विमान प्रवास भाडे (परतीच्या प्रवासासह), निर्वाह भत्ता, वैयक्तिक आरोग्य विमा यावरील विद्यार्थ्यांने प्रत्यक्ष केलेला खर्च विहित केलेल्या वित्तीय मर्यादेत मूळ शुल्क भरणा पावती, प्रवासाचे मूळ तिकीट, मूळ बोर्डींग पास  आदी तपासून विद्यार्थ्यांच्या बँक खात्यावर भारतीय रुपयामध्ये प्रतिपूर्ती केले जाईल. विद्यार्थ्यांस वार्षिक निर्वाह भत्ता अमेरिका व इतर देशांसाठी USD १५ हजार ४०० तर युकेसाठी GBP ९ हजार ९०० इतक्या रकमेच्या मर्यादेत निर्वाह भत्ता संबंधित विद्यार्थ्यांच्या परदेशातील वैयक्तिक बँक खात्यामध्ये जमा करण्यात येईल. विद्यार्थ्यांस खालील बाबींवर होणा-या खर्चाचा भार हलका व्हावा म्हणून दरवर्षी यु.एस.ए. व इतर देशांसाठी (यु.के. वगळून) १५०० USD आणि यु.के. साठी ११०० GBP इतका इतर खर्च/आकस्मिक खर्च म्हणून देण्यास मान्यता देण्यात येणार आहे.

त्याचबरोबर, या योजनेस पात्र विद्यार्थ्यांनी विहित नमुन्यातील परिपुर्ण भरलेला अर्ज आवश्यक कागदपत्रांसह ६ सप्टेंबर रोजी सायंकाळी ६.१५ वाजेपर्यंत पोस्टाने किंवा समक्ष समाज कल्याण आयुक्तालय पुणे येथे सादर करावा, असे आवाहन समाज कल्याण विभागाकडून करण्यात आले आहे.