"जैन कला, स्थापत्य व पुरातत्त्व" या विषयावर पहिले राष्ट्रीय वार्षिक संशोधन चचर्चासत्र

एज्युवार्ता न्यूज नेटवर्क 

डेक्कन कॉलेज (Deccan College)पदव्युत्तर व संशोधन संस्थेच्या (अभिमत विद्यापीठ) प्रा.भा.इ.सं. व पुरातत्त्व विभागातील भगवान शीतलनाथ जैन पुरातत्त्व अध्यासनातर्फे येत्या ३१ ऑगस्ट २०२४ रोजी जैन कला, स्थापत्य व पुरातत्त्व (Jain Art, Architecture and Archaeology) यावर पहिले राष्ट्रीय वार्षिक संशोधन चचर्चासत्र आयोजित करण्यात आले आहे.डेक्कन कॉलेज अभिमत विद्यापीठाच्या प्राचीन भारतीय इतिहास, संस्कृती व पुरातत्त्व विभागात सकाळी १० ते सायंकाळी ५.३० वाजेपर्यंत या चर्चासत्राचे आयोजन केले आहे. 

जैन कला व पुरातत्व विषयातील संशोधन व अध्ययनासाठी डेक्कन कॉलेज येथे इंटरनॅशनल स्कूल फॉर जैन स्टडीज, अमर प्रेरणा ट्रस्ट, पुणे व वर्धमान चैरिटेबल फांउडेशन यांच्या अनुदानातून भगवान शीतलनाथ जैन पुरातत्व अध्यासन स्थापित केले आहे. हे राष्ट्रीय स्वरूपाचे वार्षिक चर्चासत्र जैन कला, स्थापत्य व पुरातत्त्व विषयात संशोधन करणाऱ्या अभ्यासकांना प्रोत्साहन देण्यासाठी सुरु केलेला नाविन्यपूर्ण उपक्रम आहे.

सुविख्यात कला-इतिहास अभ्यासिका डॉ. कुमुद कानिटकर या महाराष्ट्रातील जैन स्थापत्य-शिल्पावशेष यावर बीज भाषण देणार असून उद्घाटन कार्यक्रमाचे अध्यक्ष  डेक्कन कॉलेज अभिमत विद्यापीठाचे कुलगुरू प्रो. प्रमोद पांडे भूषविणार आहेत. या चर्चासत्राच्या उदघाटन प्रसंगी डेक्कन कॉलन अभिमत विद्यापीठाचे प्र-कुलगुरू प्रो. प्रसाद जोशी व इंटरनॅशनल स्कूल फॉर जैन स्टडीजचे संचालक डॉ. श्रीनेत्र पांडे प्रमुख अतिथी म्हणून उपस्थित राहणार आहेत. या चर्चासत्राच्या विविध सत्रांचे अध्यक्षस्थान डॉ. माया पाटील, डॉ. शुभ मजुमदार, डॉ. राजश्री मोहाडीकर आणि डॉ. श्रीकांत प्रधान भूषवणार आहेत. डॉ. अशोक कुमार सिंग हे समारोप कार्यक्रमाचे अतिथी म्हणून उपस्थित राहणार आहेत.

संपूर्ण भारतातील विविध विद्यापीठ व संशोधन संस्थेतील १७ संशोधक यात जैन कला, प्रतिमाशास्त्र, स्थापत्य, जैन धर्माचा इतिहास, पुरातत्त्व आदी विषयावर संशोधन पत्राचे सादरीकरण करणार आहेत.या चर्चासत्राचे संयोजक प्रा.भा.इ. व पुरातत्त्व विभागाच्या प्रमुख प्रो. शाहिदा अन्सारी असून भगवान शीतलनाथ जैन पुरातत्त्व अध्यासनाचे डॉ. श्रीकांत गणवीर हे या चर्चासत्राचे समन्वयक आहेत.