विद्यापीठाने दिला कुलगुरूंच्या व्हायरल झालेल्या 'त्या' फोटोचा खुलासा; अधिकृत प्रकटन प्रसिद्ध

एज्युवार्ता न्यूज नेटवर्क 

सावित्रीबाई फुले पुणे विद्यापीठाचे कुलगुरू डॉ. सुरेश गोसावी यांचे एका व्यक्तीसोबतचे फोटो काही दिवसांपासून समाज माध्यमांमध्ये व्हायरल झाल्याचे आणि त्या अनुषंगाने काही बातम्यांवर तर्क वितर्क काढण्याचे समोर आले होते. त्यावर आता विद्यापीठाने जाहीर प्रकटन प्रसिद्ध केले आहे. तसेच संबंधित फोटोचा विपर्यास करून विद्यापीठाची बदनामी करणाऱ्या विरुद्ध विद्यापीठ प्रशासन कायदेशीर कारवाई करत असल्याचे प्रकटनात नमूद करण्यात आले आहे. 

प्रकटनात नमूद केलेल्या माहितीनुसार विद्यापीठाचे कुलगुरू समाजातील विविध घटकांना कामकाजानिमित्त तसेच सामाजिक अवचित त्यातून नेहमीच भेटत असतात. कार्यालयीन कामानिमित्त बाहेर असताना त्यांची फोटोत असणाऱ्या संबंधित व्यक्तीसोबत अनौपचारिक भेट झाली. सदर व्यक्ती एका उद्योग समूहाचे प्रतिनिधी असून त्यांचा सावित्रीबाई फुले पुणे विद्यापीठाशी सहभाग असलेली खरेदी प्रक्रिया तांत्रिक व प्रक्रियात्मक बाबीमुळे विद्यापीठाने यापूर्वीच रद्द केलेली आहे. त्यामुळे सदर फोटोचा विद्यापीठाच्या आर्थिक बाबीशी दरान्वयानेही संबंध असल्याचा प्रश्न निर्माण होत नाही.

फोटोचा विपर्यास करून प्रसारमाध्यमांमधून विद्यापीठाची बदनामी करणाऱ्या विरुद्ध विद्यापीठ कायदेशीर प्रक्रिया करीत आहे. तसेच विद्यापीठात प्राप्त झालेल्या निधीचा विहित कालावधीत करण्याच्या दृष्टीने आवश्यक त्या निविदा /फेरनिविदा विद्यापीठ करीत आहे, असे विद्यापीठाच्या जनसंपर्क कार्यालयातर्फे प्रसिद्ध करण्यात आले आहे.