SPPU मेस भोजन दर शुल्कवाढ अखेर मागे; व्यवस्थापन परिषदेचा निर्णय,विद्यार्थ्यांना दिलासा

एज्युवार्ता न्यूज नेटवर्क 

सावित्रीबाई फुले पुणे विद्यापीठातील मेसमधील भोजन दरात दहा रुपयांनी वाढ करण्याचा निर्णय घेण्यात आला होता. मात्र विविध संघटनांनी केलेल्या आंदोलनानंतर विद्यापीठाच्या व्यवस्थापन परिषदेने शुल्क वाढीचा निर्णय मागे घेतला आहे. त्यामुळे विद्यापीठातील विद्यार्थ्यांना आता जेवणासाठी अधिकचे पैसे मोजावे लागणार नाही.

सावित्रीबाई फुले पुणे विद्यापीठातील रिफेक्टरीसह वसतिगृहातील मेसच्या दरात १० रूपयांनी वाढ करण्याचा निर्णय विद्यापीठातर्फे घेण्यात आला होता. मात्र, दुष्काळाच्या पार्श्वभूमीवर ही दर वाढ करू नये, अशी मागणी विद्यार्थी संघटनांकडून करण्यात आली होती. विविध विद्यार्थी संघटनांनी याबाबत निवेदन दिले होते. तसेच विद्यापीठाच्या मुख्य इमारतीच्या प्रवेशद्वारासमोर धरणे आंदोलन केले होते.त्यामुळे विद्यार्थ्यांची मागणी विचारात घेऊन शुल्कवाढ मागे घेण्यात आली,असल्याचे व्यवस्थापन परिषदेच्या सदस्यांनी सांगितले. 

विद्यापीठाच्या व्यवस्थापन परिषदेच्या बैठकीत मेसच्या दरातील वाढ कमी करण्याबरोबरच मेसमधील अन्न पदार्थांचा दर्जा सुधारावा यासाठी व्यवस्थापन परिषदेच्या सदस्य डॉ. ज्योत्स्ना एकबोटे यांच्या अध्यक्षतेखाली समिती स्थापन करण्यात आली.त्यात सदस्य म्हणून डॉ. संगीता जगताप यांचा समावेश करण्यात आला आहे.

दरम्यान, मेस दर वाढ मागे घेतली असल्याचे विद्यापीठातर्फे आंदोलक विद्यार्थ्यांना सांगण्यात आले.लवकरच याबाबतचे पत्र दिले जाणार आहे. मात्र, दरवाढ मागे घेतली असली तरी आता जेवनाच्या दर्जात सुधारणा होणार का? याकडे सर्वांचे लक्ष लागले आहे.