आयटीआय प्रवेश अर्जासाठी ६ सप्टेंबरपर्यंत मुदतवाढ

एज्युवार्ता न्यूज नेटवर्क 

व्यवसाय शिक्षण व प्रशिक्षण संचालनालयाने (Directorate of Vocational Education and Training) शासकीय औद्यागिक प्रशिक्षण संस्थेत प्रवेश (ITI admission) मिळण्याकरिता प्रवेश फेरीला येत्या ६ सप्टेंबरपर्यंत मुदतवाढ दिली आहे. त्यामुळे ऑनलाईन अर्ज करणाऱ्या विद्यार्थ्यांचे प्रत्यक्ष प्रवेश येत्या ८ ते १२ सप्टेंबर या कालावधीत होणार आहेत, अशी माहिती पुण्यातील औंध औद्योगिक प्रशिक्षण संस्थेकडून देण्यात आली आहे.

हेही वाचा : शिक्षण Mrunal Ganjale : मृणाल गांजाळे का ठरल्या राष्ट्रीय शिक्षक पुरस्काराच्या मानकरी?  

काही कारणांमुळे मुदतीत प्रवेश अर्ज सादर करु न शकलेल्या उमेदवारांना  समुपदेशन फेरीत संधी उपलब्ध करुन देण्यासाठी तसेच इयत्ता दहावी पुरवणी परीक्षेतील उत्तीर्ण विद्यार्थ्यांना ऑनलाईन अर्ज भरणे, अर्जात दुरुस्ती करणे व प्रवेश शुल्क भरुन प्रवेश निश्चित करण्यास येत्या ६ सप्टेंबरपर्यंतची मुदत देण्यात आली आहे. 

संस्थास्तरीय तिस-या समुपदेशन फेरीअंतर्गत सर्व शासकीय व खासगी औद्योगिक प्रशिक्षण संस्थातील रिक्त जागा संस्थास्तरीय समुपदेशन फेरीद्वारे भरण्यासाठी येत्या ७ सप्टेंबरपर्यंत संधी उपलब्ध राहतील. समुपदेशन फेरीसाठी पात्र उमेदवार व नव्याने अर्ज भरलेल्या उमेदवारांची समुपदेश फेरीसाठी एकत्रित गुणवत्ता यादी प्रसिद्ध करण्याची व उमेदवारांना माहिती कळविण्याची कार्यवाही ७ सप्टेंबरपर्यंत करण्यात येईल.

नोंदणीकृत तथा अप्रवेशीत उमेदवारांनी औद्यागिक प्रशिक्षण संस्थानिहाय व व्यवसायनिहाय रिक्त जागांचा अभ्यास करावा. तसेच संस्थास्तरीय समुपदेशन प्रवेश फेरीसाठी उमेदवारांनी व्यक्तिश: ८ सप्टेंबर ते १२ सप्टेंबर या कालावधीत सर्व मूळ प्रमाणपत्रांसह उपस्थित राहून प्रवेश निश्चित करावा , असे आवाहनही औद्योगिक प्रशिक्षण संस्थेचे उपसंचालक आर. बी. भावसार यांनी केले आहे.