आदिवासी विभागाचा उपक्रम : मंत्री, अधिकाऱ्यांचा आश्रमशाळांमध्ये मुक्कामी दौरा

एज्युवार्ता न्यूज नेटवर्क 

आदिवासी विकास विभागाच्या (Department of Tribal Development) शासकीय आश्रमशाळांतील समस्या (Problems in government boarding schools) जाणून घेण्यासाठी तसेच तेथील विद्यार्थ्यांशी हितगुज साधण्यासाठी आदिवासी विकास मंत्र्यांसह राज्यमंत्री व आमदार, तसेच अधिकारी व कर्मचारी यांचा एक दिवसाचा मुक्कामी दौरा (One day stay tour) असणार आहे. उद्या शनिवार ७ फेब्रुवारी रोजी गडचिरोली जिल्ह्यातील ४३ शासकीय आश्रमशाळांमध्ये अधिकारी मुक्काम करणार आहेत. तर बोटोणी-मारेगांव येथे आदिवासी मंत्री डाॅ. अशोक उईके (Tribal Minister Dr. Ashok Uike) यांचा मुक्कामी असणार आहे. त्यादृष्टीने जिल्ह्यातील सर्व वसतीगृहाच्या वतीने तयारी पूर्ण करण्यात आली आहे. 

आदिवासी समाजातील एकही विद्यार्थी सोयींपासून वंचित राहणार नाही यासाठी प्रत्येक अधिकाऱ्याने एक शासकीय आश्रमशाळा दत्तक घ्यावी, असे आवाहन राज्याचे आदिवासी विकास मंत्री डॉ. अशोक उईके यांनी एका पालक व लाभार्थी मेळाव्यात केले होते. त्या अनुषंगाने मंत्री महोदयानी स्वतः मैदानात उतरून अधिकाऱ्यांना देखील कामाला लावले आहे. यामुळे वसतिगृह अधिक्षकांची तर झोपच उडाली आहे. 

आदिवासी मंत्र्यांच्या आदेशानंतर आयुक्त स्तरावरून अधिकाऱ्यांना मुक्कामाचे आदेश देण्यात आले आहेत. त्यादृष्टीने जिल्ह्यातील शासकीय आश्रमशाळांमध्ये तयारी पूर्ण करण्यात आलेली आहे. आश्रमशाळांच्या निर्मितीनंतर पहिल्यांदाच असा मुक्कामाचा संकल्प आदिवासी विकास विभागाने केलेला आहे. यातून काय सुधारणा होतात याकडे लक्ष लागले आहे. गडचिरोली जिल्ह्यात, गडचिरोली अहेरी व भामरागड असे तीन आदिवासी एकात्मिक विकास प्रकल्प आहेत. गडचिरोली प्रकल्पात २४, अहेरी प्रकल्पात ११ तर भामरागड प्रकल्पात ८, अशा एकूण ४३ आश्रमशाळा आहेत या सर्व आश्रमशाळांमध्ये अधिकारी मुक्काम करणार आहेत.