SPPU विद्यापीठ देणार ZP शिक्षकांचा जर्मन, फ्रेंच, स्पॅनिश, रशियन आणि जपानी भाषेचे प्रशिक्षण
विद्यापीठाच्या परकीय भाषा विभागामार्फत सध्या पुणे जिल्हा परिषदेच्या २४० शिक्षकांसाठी ऑनलाइन प्रशिक्षण वर्ग सुरू आहेत. पहिल्या वर्षी केवळ दोन भाषांसाठी १०२ शिक्षकांना प्रशिक्षण देण्यात आले होते. मात्र, यंदा या उपक्रमाचा मोठा विस्तार करण्यात आला असून, यामध्ये जर्मन, फ्रेंच, स्पॅनिश, रशियन आणि जपानी या पाच महत्त्वाच्या जागतिक भाषांचा समावेश करण्यात आला आहे.
Eduvarta
0
एज्युवार्ता न्यूज नेटवर्क
ग्रामीण भागातील जिल्हा परिषद शाळांच्या विद्यार्थ्यांना जागतिक स्तरावरील भाषा व संस्कृतीची ओळख करून देण्यासाठी पुणे जिल्हा परिषद आणि सावित्रीबाई फुले पुणे विद्यापीठाच्या परकीय भाषा विभागाचा संयुक्त उपक्रम आता अधिक व्यापक झाला आहे. या उपक्रमाच्या दुसऱ्या वर्षाला २१ सप्टेंबर २०२६ पासून अधिक उत्साहात सुरुवात झाली असून, यंदा भाषा शिक्षण दोनवरून थेट पाच भाषांपर्यंत विस्तारले आहे.
विद्यापीठाच्या परकीय भाषा विभागामार्फत सध्या पुणे जिल्हा परिषदेच्या २४० शिक्षकांसाठी ऑनलाइन प्रशिक्षण वर्ग सुरू आहेत. पहिल्या वर्षी केवळ दोन भाषांसाठी १०२ शिक्षकांना प्रशिक्षण देण्यात आले होते. मात्र, यंदा या उपक्रमाचा मोठा विस्तार करण्यात आला असून, यामध्ये जर्मन, फ्रेंच, स्पॅनिश, रशियन आणि जपानी या पाच महत्त्वाच्या जागतिक भाषांचा समावेश करण्यात आला आहे.यंदाच्या सत्रामध्ये जर्मन भाषेसाठी सर्वाधिक १३२ शिक्षक, फ्रेंचसाठी २८, स्पॅनिशसाठी २५, रशियनसाठी २५, तर जपानी भाषेसाठी ३० अशा एकूण २४० शिक्षकांची प्रशिक्षणासाठी निवड करण्यात आली आहे.
शिक्षकांसाठी या उपक्रमांतर्गत १८० तासांचा संरचित भाषा अभ्यासक्रम राबविण्यात येत आहे. यामध्ये प्रामुख्याने ऐकणे, वाचन, लेखन आणि बोलणे या चार भाषा-कौशल्यांवर विशेष भर दिला जात आहे. हा अभ्यासक्रम पूर्ण केल्यानंतर शिक्षकांना संबंधित परकीय भाषेतील दैनंदिन संभाषण समजून घेणे, साधे मजकूर वाचणे आणि छोटे निबंध लिहिणे यांसारखी प्राथमिक कौशल्ये आत्मसात करता येणार आहेत.
हा संपूर्ण उपक्रम ‘प्रशिक्षकांचे प्रशिक्षण’ या नाविन्यपूर्ण संकल्पनेवर आधारलेला आहे. प्रशिक्षण पूर्ण केलेले हे शिक्षक पुढे आपल्या शाळेतील विद्यार्थ्यांना संबंधित परकीय भाषा आणि संस्कृतीची प्राथमिक ओळख करून देणार आहेत. यापूर्वी पहिल्या वर्षी प्रशिक्षण घेतलेल्या १०२ शिक्षकांनी प्रत्येकी सुमारे ५० विद्यार्थ्यांपर्यंत हे ज्ञान पोहोचवले होते, ज्याचा लाभ सुमारे ५ हजार १०० विद्यार्थ्यांना मिळाला होता. यंदा शिक्षकांची संख्या वाढल्याने ग्रामीण भागातील अधिकच्या विद्यार्थ्यांना याचा फायदा होणार आहे.
परकीय भाषांच्या अध्ययनामुळे विद्यार्थ्यांच्या भाषिक जाणिवेला, संवादकौशल्याला आणि विविध संस्कृती समजून घेण्याच्या क्षमतेला मोठी चालना मिळत आहे. पुणे जिल्हा परिषद आणि विद्यापीठाचा हा सातत्यपूर्ण उपक्रम जिल्हा परिषद शाळांमधील विद्यार्थ्यांना भविष्याभिमुख आणि व्यापक जागतिक दृष्टिकोन देणारा ठरत आहे.
