MBBS ॲडमिशन प्रकरणी फसवणूक; सोशल मीडियावर जाहिरात करून लुबाडले सव्वा कोटी
राजेश गुप्ता व त्याचा साथीदार ब्रिजेश आर्या या यांना फोन लावण्याचा प्रयत्न केला. परंतु,दोघांनी फोन बंद करून ठेवला होता. त्यामुळे विद्यार्थिनीचे पालक प्रवीण किशोर हलकरे यांना आपली फसवणूक झाली असल्याचे लक्षात आले.
eduvarta@gmail.com 
एज्युवार्ता न्यूज नेटवर्क
कमी गुण असले तरी नामांकित मेडिकल कॉलेजमध्ये एमबीबीएसला ॲडमिशन (Admission to MBBS in Medical College)करून देत असल्याची खोटी माहिती सांगून बाणेर येथील दोघांनी तब्बल 11 जणांना एक कोटी 25 लाखाहून अधिक रुपयांचा गंडा घातला असल्याची धक्कादायक माहिती समोर आली आहे. याप्रकरणी पुण्यातील बाणेर पोलिसांकडे (Baner Police) राजेश गुप्ता (Rajesh Gupta)व त्याचा साथीदार ब्रिजेश आर्या (Brijesh Arya) यांच्या विरोधात गुन्हा दाखल करण्यात आला असून आरोपी फरार आहेत. गेल्या काही महिन्यांपासून प्रवेशाबाबत विद्यार्थ्यांची फसवणूक केली जात असल्याची अनेक प्रकरणे समोर येत आहेत.
बाणेर येथील काही व्यक्तींनी नामांकित मेडिकल कॉलेजमध्ये प्रवेश मिळून देत असल्याबद्दल सोशल मीडियावर जाहिरात प्रसिद्ध केली.ही जाहिरात चंद्रपूर येथील एका विद्यार्थिनीच्या आईने पाहिली. त्यानंतर संबंधित जाहिरातीमधील दूरध्वनी क्रमांकवर फोन करण्यात आला. एका महिलेने तो फोन उचलला आणि प्रवेशाबाबत राजेश गुप्ता हे संवाद साधतील, असे सांगितले. राजेश गुप्ता यांच्याशी संवाद झाल्यानंतर पालकांना बाणेर येथील कार्यालयात भेटण्यासाठी बोलाविण्यात आले. तेथे प्रवेशासाठी 35 लाख रुपये लागतील, असे सांगण्यात आले.
जळगाव येथील मेडिकल कॉलेजमध्ये प्रवेश मिळून देत असल्याचे पालकांना सांगण्यात आले. दरम्यानच्या काळात त्यांच्याकडून आणखी सात लाख रुपये उकळण्यात आले.तसेच एमबीबीएस प्रवेशासाठी 6 लाख 27 हजार रुपयांचा डीडी कॉलेजमध्ये घेऊन जाण्याबाबत सांगितले गेले. पालक संबंधित रक्कमेचा डीडी घेऊन कॉलेजमध्ये पोहोचले. परंतु, तेथे गेल्यावर राजेश गुप्ता व त्याचा साथीदार ब्रिजेश आर्या या यांना फोन लावण्याचा प्रयत्न केला. परंतु,दोघांनी फोन बंद करून ठेवला होता. त्यामुळे विद्यार्थिनीचे पालक प्रवीण किशोर हलकरे यांना आपली फसवणूक झाली असल्याचे लक्षात आले. त्यांनी यापूर्वी बाणेर येथे भेट घेतलेल्या कार्यालयात जाऊन चौकशी केली. परंतु,ते कार्यालय बंद झाले होते. त्यामुळे हलकरे यांनी बाणेर पोलिसांकडे फसवणूक झाल्याची तक्रार दिली.
प्रवीण हलकरे यांना केवळ आपलीच फसवणूक झाले आहे, असे नाही तर आपल्याबरोबर अनेकांची फसवणूक झाली असल्याचे निदर्शनास आले. त्यात पितांबर जावळे यांच्याकडून वीस लाख रुपये, नितीन म्हणाव यांच्याकडून एक लाख रुपये, कृष्णकुमार पांडे यांच्याकडून सात लाख रुपये, ज्ञानेश्वर गावंडे यांच्याकडून पाच लाख रुपये, धर्मेंद्र दलेला यांच्याकडून वीस लाख रुपये, दिनकर वर्तुळे यांच्याकडून 16 लाख रुपये, सुरेश भन्साळी यांच्याकडून बारा लाख रुपये, अनिल मुलांडे यांच्याकडून आठ लाख रुपये, गणेश यादव यांच्याकडून आठ लाख 75 हजार रुपये, यशवेत सातपुते यांच्याकडून 11 लाख रुपये सत्यव्रत नाथ यांच्याकडून सुमारे आठ लाख रुपये अशी एकूण एक कोटी 26 लाख 28 हजार रुपयांची फसवणूक झाली असल्याचे समोर आले. पोलिस पा प्रकारणी तपास करत आहेत.
