सावधान:युजीसीचे अधिकारी असल्याचे सांगून आर्थिक फसवणूक

एज्युवार्ता न्यूज नेटवर्क 

विद्यापीठ अनुदान आयोगाकडे (University Grants Commission)सादर केलेल्या प्रस्तावांना मंजूरी मिळवून देत असल्याचे सांगून आर्थिक फसवणूक (financial fraud)केली जात असल्याची धक्कादायक माहिती स्वत: युजीसीने प्रसिध्दी पत्रकाद्वारे प्रसिध्द केली आहे. युजीसी अधिकाऱ्यांचे प्रतिनिधी (Representatives of UGC officials)असल्याचे सांगून कोणी पैशांची मागणी करत असेल तर तात्काळ याबाबत पोलिसांकडे तक्रार करावी (Report to the police)किंवा युजीसीने दिलेल्या टोल फ्री क्रमांकावर संपर्क साधावा,असे आवाहन विद्यापीठ अनुदान आयोगाचे सचिव मनीष जोशी यांनी केले आहे.

शैक्षणिक संस्थांची सुध्दा कोट्यवधी रुपयांची फसवणूक केली जात असल्याचे नुकतेच आढळून आले आहे.पुण्यातील एमआयटी विद्यापीठाला सुमारे अडीच कोटी रुपयांना ऑनलाईन गंडा घातल्याचे पोलिसांकडे तक्रार दिल्यानंतर समोर आले. त्यातच युजीसीकडे सुध्दा यासंदर्भातील वेगवेगळ्या तक्रारी प्राप्त झाल्या आहेत.या  पार्श्वभूमीवर युजीसीने परिपत्रक प्रसिध्द केले असून युजीसीने प्रस्ताव मंजूरीसाठी कोणत्याही व्यक्तीला किंवा एजन्सीला नियुक्त केले नाही. युजीसी नियम व अटींचे काटेकोर पालन करूनच प्रस्तावांना मंजूरी देते.त्यामुळे कोणी अशा प्रकारचे दावे करत असेल तर अशा व्यक्ती व एजन्सीपासून सतर्क रहा,असे युजीसीचे सचिव मनीष जोशी यांनी पत्रकाद्वारे स्पष्ट केले आहे.

 विद्यापीठ अनुदान आयोगाच्या अधिकाऱ्यांचे प्रतिनिधी असल्याचे सांगून कोणी फसवणूक करत असेल तर युजीसीच्या 011- 23239337 आणि 23604121 या टोल फ्री क्रमांकावर संपर्क साधावा.  किंवा secy.ugc@nic.in या ई-मेल वर तक्रार पाठवावी,असे आवाहन करण्यात आले आहे.