UPSC ची बंपर भरती : IAS ची १ हजार ३०० ,तर IPS ची ५८६ पदे रिक्त

एज्युवार्ता न्यूज नेटवर्क     

केंद्रीय लोकसेवा आयोग (UPSC) स्पर्धा परीक्षेची तयारी करणाऱ्या उमेदवारांसाठी महत्त्वाची अपडेट समोर आली आहे. देशभरात भारतीय प्रशासकीय सेवा (आयएएस) पदाच्या १ हजार ३०० जागा तर भारतीय पोलीस सेवा (आयपीएस) पदाच्या व ५८६ जागा रिक्त (1 Thousand 300 IAS and 586 IPS posts are vacant) असल्याची माहिती केंद्रीय मंत्री जितेंद्र सिंह (Jitendra Singh) यांनी दिली. त्यामुळे आगामी काळात UPSC द्वारे बंपर भरती होण्याची शक्यता वर्तवण्यात आली आहे. राज्यसभेतील प्रश्नाचे लेखी उत्तर देताना त्यांनी ही माहिती दिली. 

एक जानेवारी २०२४ पर्यंत आयएएससाठी ६ हजार ८५८ पदे मंजूर केली होती. त्यापैकी ५ हजार ५४२ अधिकारी कार्यरत असल्याचे सिंह यांनी स्पष्ट केले. केंद्र सरकारने आयपीएसच्या ५ हजार ५७ पदांना मंजूरी दिलेली असून त्यापैकी ४ हजार ४६९ पदांवर अधिकारी कार्यरत आहेत. आयएएसच्या १ हजार ३१६ रिक्त पदांपैकी ७९४ हे सरळ भरती तर ५२२ पदोन्नतीची पदे असल्याचे त्यांनी सांगितले. 

आयपीएसच्या ५८६ रिक्त पदांपैकी २०९ सरळ भरती व ३७७ पदोन्नतीची रिक्त पदे आहेत. भारतीय वन सेवा अर्थात आयएफएस विभागात अधिकाऱ्यांच्या ३ हजार १९३ पदांना मंजूरी दिलेली आहे. त्यापैकी २ हजार १५१ अधिकारी कार्यरत आहेत. या विभागातील १ हजार ४२ पदांपैकी ५०३ सरळ भरती तर ५३९ पदोन्नतीची रिक्त पदे आहेत.

आयएएस, आयपीएस व आयएफएस अधिकाऱ्यांच्या भरती केंद्रीय लोकसेवा आयोगातर्फे आयोजित केल्या जाणाऱ्या नागरी सेवा परीक्षेद्वारे केली जाते. रिक्त जागेसंदर्भात माहिती देताना गत पाच वर्षांत सर्वसाधारण वर्ग, एससी, एसटी व ओबीसी वर्गातील आयएएस, आयपीएस व आयएफएस म्हणून झालेल्या नियुक्तीसंदर्भात मंत्री जितेंद्र सिंह यांनी सविस्तर माहिती दिली.