अभाविपचे माजी अध्यक्ष, कुलगुरू डाॅ. अशोक मोडक यांचे निधन 

एज्युवार्ता न्यूज नेटवर्क 

राज्याच्या शिक्षण क्षेत्रातून अत्यंत दुःखद बातमी समोर आलीय. अखिल भारतीय विद्यार्थी परिषदेचे  (ABVP) राष्ट्रीय माजी अध्यक्ष डाॅ. अशोक मोडक (Ashok Modak) यांचे निधन झाले आहे. मोडक हे माजी आमदार देखील होते. तसेच मुंबई विद्यापीठातील राज्यशास्त्राचे निवृत्त प्राध्यापक म्हणून देखील त्यांनी काम केले आहे. त्यांनी छत्तीसगड केंद्रीय विद्यापीठात कुलगुरू (Former Vice Chancellor) देखील काम केल्याची माहिती राज्याचे मुख्यमंत्री देवेंद्र फडणवीस यांनी दिली आहे. त्यांनी शुक्रवारी, दि. 2 जानेवारी रोजी रात्री 9.12 वाजता मुंबईतील हिरानंदानी रुग्णालयात अखेरचा श्वास घेतला. त्यांच्या पश्चात पत्नी, एक मुलगा व एक मुलगी असा परिवार आहे. गेल्या एक वर्षापासून ते कर्करोगाशी झुंज देत होते. अखेर त्यांच्या प्राणज्योत मावळली  (Dr. Ashok Modak passes away) असून या घटनेने सर्वत्र शोककळा पसरली आहे.

हेही वाचा - स्त्री शिक्षणाच्या जनक सावित्रीबाई फुले यांच्या जयंतीनिमित्त पंतप्रधान मोदींकडून कार्याला उजाळा

मुंबई विद्यापीठातील राज्यशास्त्राचे निवृत्त प्राध्यापक तसेच अखिल भारतीय विद्यार्थी परिषदेचे माजी राष्ट्रीय अध्यक्ष. डॉ. अशोकराव मोडक यांचा जन्म 1940 मध्ये झाला. डॉ. अशोकरावांनी दिल्ली विद्यापीठातून अर्थशास्त्रात एम.ए. आणि राज्यशास्त्रात एम.ए. आणि जेएनयूमधून पीएच.डी. केले. त्यांचा पीएच.डी. विषय "भारताला सोव्हिएत आर्थिक मदत" होता. यामुळे, त्यांना सोव्हिएत रशियाच्या आर्थिक आणि राजकीय समस्यांवरील तज्ज्ञ मानले जात होते.

मोडक यांनी 1963 ते 1994 पर्यंत प्राध्यापक म्हणून काम केले. 2015 मध्ये, भारत सरकारने त्यांना पाच वर्षे राष्ट्रीय संशोधन प्राध्यापक पदाने सन्मानित केले. अशोकराव, एक कुशाग्र बुद्धिमत्ता असलेले आणि त्यांच्या टीमचे नेते, यांनी विविध विषयांवर संशोधन केले आहे. त्यांनी 104 प्रबंध आणि 40 हून अधिक पुस्तके लिहिली आहेत. त्यांनी राष्ट्रीय आणि आंतरराष्ट्रीय स्तरावर विविध विद्यापीठांमध्ये व्याख्याने दिली आहेत.

 मुख्यमंत्री देवेंद्र फडणवीस यांच्याकडून श्रद्धांजली अर्पण

अ.भा. विद्यार्थी परिषदेचे माजी राष्ट्रीय अध्यक्ष, माजी आमदार डॉ अशोकराव मोडक यांच्या निधनाचे वृत्त दुःखद आहे. वैचारिक मंथन आणि शिक्षण, सांस्कृतिक क्षेत्रात त्यांनी दिलेले योगदान अतुलनीय असेच होते. भारतीय तत्त्वज्ञान, एकात्म मानवदर्शन आणि वीर सावरकर इत्यादींवर विपुल लेखन त्यांनी केले. अर्थशास्त्र आणि राज्यशास्त्र हे त्यांच्या आवडीचे विषय होते. रशिया आणि भारत संबंध हा सुद्धा त्यांच्या अभ्यासाचा विषय होता. छत्तीसगड केंद्रीय विद्यापीठाचे कुलगुरू म्हणूनही त्यांनी काम केले. मी त्यांना भावपूर्ण श्रद्धांजली अर्पण करतो. त्यांच्या कुटुंबियांच्या दुःखात आम्ही सहभागी आहोत. ॐ शांति अशा शब्दात मुख्यमंत्री देवेंद्र फडणवीस यांनी डॉ. अशोक मोडक यांना श्रद्धांजली अर्पण केलीय.