दुचाकीचे नुकसान केल्याच्या संशयावरून शिक्षकाकडून वसतिगृहातील ३२ विद्यार्थ्यांना अमानुष मारहाण

एज्युवार्ता न्यूज नेटवर्क

लातूर जिल्ह्यातील एका शाळेच्या वसतिगृहात धक्कादायक घटना घडल्याचे उघडकीस आली आहे. अहमदपूर तालूक्यातील थोरलेवाडी येथील क्राईस्ट इंटरनॅशनल स्कूलच्या (Christ International School Thorlewadi) वसतिगृहातील शिक्षकाने मोटारसायकलचे नुकसान केल्याच्या संशयावरून (Suspected of damaging a motorcycle) ३० ते ३२ विद्यार्थ्यांना अमानुष मारहाण (30 to 32 students were brutally beaten) केल्याचे समोर आले आहे. पिडित विद्यार्थ्यांच्या पालकांनी आक्रमक होत वसतिगृह प्रशासनाला जाब विचारल्यानंतर शाळेच्या प्राचार्यांनी संबंधित शिक्षकाविरोधात अहमदपूर पोलिस ठाण्यात तक्रार (Complaint at Ahmedpur police station) दिली आहे. 

पोलिसांनी दिलेल्या माहितीनुसार,  अहमदपूर तालुक्यातील थोरलेवाडी येथील क्राईस्ट इंटरनॅशनल स्कूलच्या वसतिगृहातील शिक्षक उज्ज्वल प्रकाश सोनी (रा. जवाहर वॉर्ड बैतुल, मध्य प्रदेश) यांना विद्यार्थ्यांनी आपल्या मोटारसायकलचे नुकसान केल्याचा संशय होता. त्यावरून त्यांनी शाळेच्या वसतिगृहातील ३० ते ३२ विद्यार्थ्यांना अश्लील भाषेत शिवीगाळ करत वेळूच्या काठीने अमानुष मारहाण केली. तसेच मी या शाळेचा प्राचार्य होणार आहे. तेव्हा तुम्हाला बघून घेतो, अशी धमकीही त्याने विद्यार्थ्यांना दिली. शाळेचे प्राचार्य जैबाबेरला प्रपीन नाहर यांनी तत्काळ अहमदपूर पोलिस ठाण्यात तक्रार दिली. त्यावरून आरोपी उज्ज्वल सोनी याच्याविरुद्ध गुन्हा दाखल करण्यात आला असून पोलिसांनी आरोपीला तत्काळ अटक केली आहे. 

मी स्वतः शाळेचा प्राचार्या म्हणून संबंधित शिक्षक उज्ज्वल सोनी यांच्याविरुद्ध पोलिस ठाण्यात तक्रार दिल्याने गुन्हा दाखल झाला आहे. विद्यार्थ्यांची सुरक्षितता ही आमची सर्वोच्च प्राथमिकता आहे. घडलेली घटना अत्यंत दुर्दैवी व निषेधार्ह आहे. संबंधित व्यक्तीविरुद्ध तत्काळ कायदेशीर कारवाई करण्यात आली आहे. शाळा प्रशासन विद्यार्थ्यांच्या पाठीशी ठामपणे उभे आहे. यापुढेही विद्यार्थ्यांची पूर्ण काळजी घेतली जाईल, असे क्राईस्ट इंटरनॅशनल स्कूलच्या प्राचार्या जैबाबेरला नाडर यांनी सांगितले.