गॅस टंचाईमुळे स्पर्धा परीक्षार्थींसाठी ‘इग्नाइट अकॅडेमी’चा पुढाकार; मोफत जेवणाची सुविधा
विद्यार्थ्यांना गैरसोय होऊ नये आणि नियोजन सुलभ व्हावे यासाठी, इग्नाइट अकॅडेमी स्टडी पॉईंट, शास्त्री रोड, मांगीरबाबा चौक, पुणे येथून जेवणाचे कूपन वितरित केले जात आहेत. याच ठिकाणी दररोज सायंकाळी 7 वाजता विद्यार्थ्यांना मोफत जेवण दिले जात आहे.
eduvarta@gmail.com 
एज्युवार्ता न्यूज नेटवर्क
इराण -अमेरिका युध्दामुळे निर्माण झालेल्या गॅस टंचाईचा फटका पुण्यात विद्यार्थ्यांनाही बसू लागला आहे. विशेषतः पुण्यात स्पर्धा परीक्षांची तयारी करणाऱ्या विद्यार्थ्यांच्या मेस बंद पडल्याने त्यांच्या रोजच्या जेवणाचा प्रश्न निर्माण झाला आहे. आगामी मुख्य परीक्षा आणि इतर महत्त्वाच्या स्पर्धा परीक्षांच्या पार्श्वभूमीवर ही परिस्थिती अधिकच चिंताजनक ठरत आहे. अशा कठीण परिस्थितीत विद्यार्थ्यांच्या अडचणी ओळखून ‘इग्नाइट अकॅडेमी’ने सामाजिक बांधिलकी जपत पुढाकार घेतला आहे. अकॅडेमीच्या वतीने, जे विद्यार्थी जेवणाच्या समस्येमुळे त्रस्त आहेत, त्यांच्यासाठी दररोज सायंकाळी 7 वाजता मोफत जेवणाची व्यवस्था करण्यात आली आहे. या उपक्रमासाठी ‘वास्तव कट्टा’चे सहकार्य लाभत आहे.
विद्यार्थ्यांना गैरसोय होऊ नये आणि नियोजन सुलभ व्हावे यासाठी, इग्नाइट अकॅडेमी स्टडी पॉईंट, शास्त्री रोड, मांगीरबाबा चौक, पुणे येथून जेवणाचे कूपन वितरित केले जात आहेत. याच ठिकाणी दररोज सायंकाळी 7 वाजता विद्यार्थ्यांना मोफत जेवण दिले जात आहे.
या उपक्रमामागे संस्थेचे संचालक धनंजय कचाले यांचा मोलाचा वाटा असून त्यांनी स्वतः पुढाकार घेत जेवणाचा संपूर्ण खर्च उचलला आहे. सध्या या उपक्रमामुळे दररोज सुमारे 200 ते 250 विद्यार्थ्यांच्या एक वेळच्या जेवणाचा प्रश्न सुटत आहे.
दरम्यान, पुण्यात हजारो विद्यार्थी स्पर्धा परीक्षांची तयारी करत असल्याने ही मदत अपुरी ठरत आहे. त्यामुळे अधिकाधिक दानशूर व्यक्ती, संस्था आणि सामाजिक संघटनांनी पुढे येऊन या उपक्रमात हातभार लावण्याची गरज व्यक्त केली जात आहे.विद्यार्थ्यांच्या अडचणीच्या काळात उभा राहिलेला हा उपक्रम केवळ मदतीचा नाही, तर समाजातील सहकार्य आणि संवेदनशीलतेचे प्रेरणादायी उदाहरण ठरत आहे.
विद्यार्थी या सुविधेचा लाभ घेण्यासाठी तसेच जेवण व कुपन उपलब्धतेसाठी इग्नाइट अकॅडेमी स्टडी पॉईंट, शास्त्री रोड, मांगीरबाबा चौक, पुणे -30 या ठिकाणी भेट देऊ शकतात. तसेच अधिक माहितीसाठी 9588427331 (वैभव केंद्रे) आणि 8484086061 (किरण निंभोरे) यांना संपर्क साधू शकतात.
