राज्यातील सर्व विद्यापीठाची GST माफ करा; युवासेनेची उच्च शिक्षणमंत्र्यांकडे मागणी 

एज्युवार्ता न्यूज नेटवर्क

मुंबई विद्यापीठाला (Mumbai University) नुकतीच १६ कोटी ९० लाख रुपयांचा (Rs 16 Cr 90 lakh GST) वस्तू आणि सेवा कर (जीएसटी) भरण्यासाठी नोटीस देण्यात आली आहे. त्यानंतर आता युवासेना विद्यापीठांना या आर्थिक परिस्थितीतून बाहेर काढण्यासाठी मैदानात उतरली आहे. युवासेनेच्या सिनेट सदस्यांनी (Youth Senate Member) मुंबई विद्यापीठाचे यांची भेट घेऊन व उच्च आणि तंत्रशिक्षण मंत्री चंद्रकांत पाटील (Chandrakant Patil) यांना पत्र लिहून राज्यातील सर्व विद्यापीठाची जीएसटी माफ करण्याची मागणी करण्यात आली आहे. 

युवासेनेने मंत्री चंद्रकांत पाटील यांना लिहिलेल्या पत्रात म्हटले आहे की, मुंबई विद्यापीठाला केंद्रीय जीएसटी विभागाने सन २०१७ ते आतापर्यंत एकूण १६ कोटी ९० लाख रुपये एवढा भरणा करावा असे आम्ही वृत्तपत्रांमध्ये वाचले आहे. आम्ही या निवेदनाद्वारे आपणाकडे आग्रही मागणी करीत आहोत की, मुंबई विद्यापीठाला संलग्न अंदाजे ९४० महाविद्यालये असून जवळपास १० लाख विद्यार्थी शिक्षण घेत आहेत. 

 विद्यार्थ्यांच्या प्रवेश शुल्कातून महाविद्यालये तसेच विद्यापीठाचा दैनंदिन खर्च करण्यात येत असतो. शासनाने कर रुपाने एवढी रक्कम आकारली तर त्याचा भुर्दंड विद्यार्थ्यांवरच पडणार आहे. केंद्रात व अनेक राज्यांमध्ये आपल्या भाजप विचाराची सरकारे असल्यामुळे देशातील सर्व महाविद्यालये आणि विद्यापीठे यांना जीएसटी कर प्रणालीतून वगळण्यासाठी पुढाकार घेऊन मुंबई महाराष्ट्रासह देशातील सर्व विद्यार्थ्यांना दिलासा द्यावा, असे देण्यात आलेल्या निवेदनात म्हटले आहे. 

राज्यातील अन्य सरकारी विद्यापीठांनाही अशा प्रकारची जीएसटी भरण्याची नोटीस आली आहे. त्यापैकी काही विद्यापीठांनी जीएसटी आयुक्तांकडे अपिल दाखल करून जीएसटी माफीची मागणी केली आहे. तसेच विद्यापीठांनी राज्य सरकारकडेही जीएसटीतून वगळण्याची मागणी केली आहे.