शिल्लक जागांसाठी विद्यापीठे स्वतःची प्रवेश परीक्षा घेऊ शकतात; UGC निर्णय 

एज्युवार्ता न्यूज नेटवर्क 

विद्यापीठ अनुदान आयोगाने (UGC)  विद्यापीठांना पदवी आणि पदव्युत्तर अभ्यासक्रमांच्या प्रवेशासाठी त्यांच्या स्वत:च्या प्रवेश परीक्षा घेण्यास परवानगी दिली आहे. प्रवेशाच्या नियमित फेरीनंतर जागा रिक्त राहिल्यास, विद्यापीठे त्यांच्या स्वत: च्या प्रवेश परीक्षा घेऊन प्रवेश द्यावेत,असे विद्यापीठ अनुदान आयोगाने स्पष्ट केले आहे. 

UGC चे अध्यक्ष एम. जगदीश कुमार म्हणाले , "विद्यापीठांना CUET स्कोअर वापरण्यासाठी स्टँडर्ड ऑपरेटिंग प्रोसिजर (SOP) देण्यात आली आहे. ज्यात अनेक प्रवेश फेऱ्यांचा समावेश आहे. समुपदेशनाच्या अनेक फेऱ्या आणि पात्रता निकषांमध्ये शिथिलता दिल्यानंतरही जागा रिक्त राहिल्यास, विद्यापीठे SOP नुसार त्या भरण्यासाठी त्यांच्या स्तरावर स्वतंत्र प्रवेश परीक्षा घ्याव्यात. 
 कोरोना पूर्वी, जेव्हा प्रवेश परीक्षा सुरू झाल्या नव्हत्या आणि विद्यार्थ्यांना त्यांच्या बारावीच्या गुणांच्या आधारे प्रवेश दिला जात होते, तेव्हा शैक्षणिक सत्र जुलै महिन्यात सुरू व्हायचे. यंदा ऑगस्टमध्ये प्रवेशाला सुरुवात होत असल्याने हा निर्णय महाविद्यालयीन प्रवेशांना मोठा धक्का देणारा ठरू शकतो.

तीन वर्षांपासून, देशभरातील विद्यापीठे 2022 मध्ये सुरू झालेल्या कॉमन युनिव्हर्सिटी प्रवेश परीक्षेद्वारे विद्यार्थ्यांना त्यांच्या यूजी आणि पीजी प्रोग्राममध्ये प्रवेश देत आहेत. अलाहाबाद विद्यापीठ आणि इतर काही  विद्यापीठांच्या तक्रारींनंतर हे पाऊल उचलण्यात आले आहे. 

विद्यापीठांनी केलेल्या तक्रारीत म्हटले आहे की, "त्यांना CUET मध्ये सहभागी होण्यासाठी "बळजबरी" केली जात आहे आणि प्रवेशासाठी वर्षानुवर्ष विलंब होत आहे. तसेच जागा रिक्त राहिल्या तरीही त्यांना स्वतंत्र परीक्षा घेण्याची परवानगी दिली जात नाही." दरम्यान नॅशनल टेस्टिंग एजन्सी (NTA) ने अलीकडेच CUET UG निकाल जाहीर केला आणि काही सहभागी केंद्रीय, राज्य आणि खाजगी विद्यापीठे प्रवेश घेण्याच्या प्रक्रियेत आहेत.