लाडकी बहीण योजनेचे काम आता शिक्षकांना करावे लागणार..

एज्युवार्त न्यूज नेटवर्क 

राज्य सरकारने मुख्यमंत्री माझी लाडकी बहीण ही योजना (Dear sister scheme) मोठ्या थाटात सुरू केली. मात्र आता कमी वेळात जास्त लोकांपर्यंत ही योजना पोहोचली जावी म्हणून शिक्षकांना हाताखाली (Work to be given to teachers) घेतले जात आहे. अशैक्षणिक कामे नको ? अशी मागणी शिक्षकांची असताना आता नवी मुंबई महानगरपालिकेचे शिक्षण उप आयुक्त यांनी या नव्या योजनेचे काम करण्याचे आदेश शिक्षकांना (Order to teachers) दिले आहेत. त्यासंबंधित परिपत्रक मुख्याध्यापकांना पाठवण्यात आले आहेत.  

मुख्यमंत्री माझी लाडकी बहीण योजनेअंतर्गत २१ ते ६० वयोगटातील पात्र महिलांना शासनातर्फे दरमहा १५०० रुपये दिले जाणार आहेत. या योजनेच्या पात्र महिलांचे अर्ज मुदतीत भरण्याचे काम राज्यभरात सुरु आहे. नवी मुंबई महानगरपालिकेच्या कार्यक्षेत्रात मुख्यमंत्री माझी लाडकी बहीण योजनेत महिलांची नोंदणी कमी वेळात आणि तत्काळ व्हावी,  यासाठी उप आयुक्त (शिक्षण) यांनी महापालिकेच्या शाळांच्या मुख्याध्यापकांना आदेश काढले आहेत. येत्या ३१ ऑगस्ट २०२४ या  कालावधीपर्यंत ही योजना यशस्वीपणे राबवण्याचेही म्हटले आहे. यामुळे आता महामुंबईतील शिक्षकांनी विरोध करण्यास सुरुवात केली आहे

शाळेतील एक वर्गखोली, संगणक, इंटरनेट सुविधा व बालवाडी शिक्षकांपासून इयता दहावीपर्यंत सर्व शिक्षकांना रोटेशन पद्धतीने नियुक्त करण्याचे आदेश दिले आहेत. यासंदर्भात महामुंबईतील शिक्षकांनी नाराजी व्यक्त करत आता या योजनेचेही काम आम्ही करायचे का, असा सवाल केला आहे. त्यामुळे पुढील काळात शिक्षकांची भूमिका काय असणार हे महत्त्वाचे ठरणार आहे.