विद्यापीठाच्या सुरक्षेचेकडे रॅप बनवणाऱ्यांनी कसे तोडले ?   

           सावित्रीबाई फुले पुणे विद्यापीठाच्या SPPU मुख्य इमारतीच्या दोन्ही बाजूला मोठे लोखंडी दरवाजे असून या ठिकाणी सुरक्षा कर्मचारी तैनात असतात. तसेच कुलगुरू कार्यालयाजवळील Vice Chancellor's Office प्रवेशद्वारावर येणाऱ्या जाणाऱ्याची सखोल चौकशी करूनच त्यांना इमारतीत प्रवेश दिला जातो, असे असताना शिव्यांचा भडिमार असलेले रॅप सॉंग RAP SONG तयार करणाऱ्यांना विद्यापीठाच्या सभागृहात तलवार, पिस्तुल आणि दारूच्या बाटलीसह प्रवेश कसा दिला गेला. रॅप सॉंगचे चित्रीकरण करेपर्यंत सुरक्षा अधिकारी व कर्मचारी काय करत होते, असे अनेक प्रश्न यानिमित्ताने उपस्थित होत आहेत.                                 

 विद्यापीठ प्रशासनाने दिलेल्या तक्रारीनुसार विद्यापीठाच्या परवानगी शिवाय चित्रीकरण केल्याप्रकरणी पोलिसांकडून संबंधितांवर कारवाई होईलच. परंतु, विद्यापीठाच्या सुरक्षा विभागाचे सुरक्षेचेकडे मोडून चित्रीकरणासाठी आत आलेल्या तरुणांना सुरक्षा कर्मचाऱ्यांनी का हटकले नाही. परवानगीशिवाय चित्रीकरण झाले, असे विद्यापीठ प्रशासनाकडून सांगितले जात असेल तर या तरुणांना चित्रीकरण करण्यासाठी सभागृह कोणी खुले करून दिले, या सर्व प्रश्नांची उत्तरे विद्यापीठ प्रशासनाने द्यावीत, अशी मागणी आता विद्यापीठाच्या आजी माजी आधिसभा सदस्यांकडून केली जात आहे.

“ सावित्रीबाई फुले पुणे विद्यापीठासारख्या मोठी ऐतिहासिक परंपरा असलेल्या शैक्षणिक संस्थेत अनधिकृतपणे घुसून आई बहिणी वरून शिव्या देऊन कोणी गाणे चित्रीत करत असेल तर ते निश्चितच निषेधार्य आहे. आई बहिणीच्या नावाने शिव्या देऊन शाब्दिक बलात्कारच केला जात आहे.  त्यामुळे या सर्व घटनेची कसून चौकशी नक्की करणार आणि दोषी व्यक्तींवर कडक कारवाई नक्की होणार.”  

- बागेश्री मंठाळकर, व्यवस्थापन परिषद सदस्य, सावित्रीबाई फुले पुणे विद्यापीठ 

----------------

" सावित्रीबाई फुले पुणे विद्यापीठाने वादग्रस्त रॅप सॉंग प्रकरणाची कसून चौकशी करावी. तसेच हे रॅप सॉंग चित्रित करण्यासाठी मदत करणाऱ्या विद्यापीठ प्रशासनातील दोषी अधिकारी व कर्मचाऱ्यांवर कठोर कारवाई करावी. अन्यथा विद्यापीठाविरोधात आंदोलन केले जाईल." 

-  संतोष ढोरे,माजी अधिसभा सदस्य, सावित्रीबाई फुले पुणे विद्यापीठ