केंद्रीय मंत्र्यांनी सांगितली देशाची प्रगती आणि विकासाची व्याख्या

एज्युवार्ता न्यूज नेटवर्क

कोणत्या देशाने कोणते नवीन तंत्रज्ञान (Technology) शोधले आहे. कोणते इनोव्हेशन (INOVATION) केले आहे. कोणते रिसर्च (Research) केले आहे याआधारे त्या देशाची प्रगती आणि विकास मोजला जातो असे मत केंद्रीय मंत्री नितीन गडकरी (Union Minister Nitin Gadkari) यांनी व्यक्त केले आहे. इंजिनीअर दिवसाचे (Engineer day) औचित्य साधत पुण्यातील सीईओपी तंत्र विद्यापीठाच्या वतीने ‘सीईओपी अभिमान पुरस्कार’ (CEOP Abhiman Award) सोहळ्याचे आयोजन करण्यात आले होते याप्रसंगी ते बोलत होते.

पुढे बोलताना गडकरी म्हणाले, "इंजिनीअर निर्माण कार्य करतात. या निर्माण कार्यामध्ये सातत्याने नवनव्या गोष्टी बदलत असतात, घडत असतात. आज अमेरिकेने याबाबत आपला अव्वल क्रमांक प्राप्त केला आहे. ज्यावेळी मी मंत्री झालो तेव्हा इंडस्ट्री ७ लाख करोड रुपयांची होती. जगात आपल्या देशाचा नंबर सातवा होता आणि आता आपला नंबर जगात तिसऱ्या क्रमांकावर येऊन ठेपला आहे. नुकतच आपण जपानला मागे टाकत तिसऱ्या क्रमांकावर आलो आहे, यात पहिल्या स्थानी अमेरिका आहे त्यांची एकूण इंडस्ट्री ७८ लाख कोटी आहे, दुसऱ्या स्थानी चीन आहे ज्यांची इंडस्ट्री ४४ लाख कोटी आहे आणि तिसऱ्या स्थानी भारत आहे ज्याची इंडस्ट्री २२ लाख कोटी आहे. आता पुढे आपण नक्कीच अमेरिकेच्याही पुढे जाऊ असा विश्वास देखील त्यांनी यावेळी व्यक्त केला आहे.

याशिवाय पुढच्या पाच वर्षानंतर अर्बन ट्रान्सपोर्टमध्ये डीझेलची गाडी दिसणार नाही तर १०० टक्के इलेक्ट्रिक बस दिसतील तसेच सेमी कंडक्टरमध्ये आपण जगातलं पहिल्या क्रमांकाचं निर्मिती केंद्र बनणार आहोत असा विश्वास गडकरी यांनी यावेळी व्यक्त केला.  या कार्यक्रमाला उच्च व तंत्रशिक्षण मंत्री चंद्रकांत पाटील यांच्यासह इतर मान्यवरही मोठ्या संख्येने उपस्थित होते.