पाचवी, आठवी शिष्यवृत्ती परीक्षेचा निकाल जाहीर; गुणवत्ता यादीत 'त्या' विद्यार्थ्यांचा समावेश नाही

एज्युवार्ता न्यूज नेटवर्क 

Scholarship Exams Results 2025 : महाराष्ट्र राज्य परीक्षा परिषदेच्या (Maharashtra State Examination Council) माध्यमातून घेण्यात आलेल्या इयत्ता पाचवी व आठवी शिष्यवृत्ती परीक्षेचा अंतिम निकाल (Final results of class 5th and 8th scholarship exams)व गुणवत्ता यादी जाहीर झाली आहे. विद्यार्थ्यांना परिषदेच्या https://www.mscepune.in/ या संकेतस्थळावर निकाल पाहण्यासाठी उपलब्ध आहे. इयत्ता पाचवीचा शेकडा निकाल 23.90% तर इयत्ता आठवीचा निकाल 19.30% एवढा लागला आहे. इयत्ता पाचवीच्या 16 हजार 693 विद्यार्थ्यांना तर इयत्ता आठवीच्या पंधरा हजार 93 विद्यार्थ्यांना अशा एकूण 31 हजार 786 विद्यार्थ्यांना शिष्यवृत्ती  मिळणार आहे.

इयत्ता पाचवीसाठी ५ लाख 63 हजार 300 6 विद्यार्थ्यांनी नोंदणी केली होती. त्यातील ५ लाख 47 हजार 504 विद्यार्थ्यांनी परीक्षा दिली. परीक्षा दिलेल्या विद्यार्थ्यांपैकी १  लाख ३० हजार 846 विद्यार्थी शिष्यवृत्तीस पात्र झाले. त्याचप्रमाणे इयत्ता आठवीच्या ३ लाख 78 हजार 95 विद्यार्थ्यांनी परीक्षेसाठी नोंदणी केली होती. नोंदणी केलेल्या विद्यार्थ्यांपैकी ३ लाख 65 हजार 754 विद्यार्थी परीक्षेस उपस्थित राहिले.त्यातील 70 हजार 571 विद्यार्थी शिष्यवृत्तीस पात्र झाले. शिष्यवृत्तीस पात्र झालेल्या विद्यार्थ्यांची संख्या मोठी असली तरी प्रत्येक जिल्हा निहाय शिष्यवृत्ती दिल्या जाणाऱ्या विद्यार्थ्यांची संख्या संचानुसार निश्चित करण्यात आली आहे. त्यानुसार महाराष्ट्रातील मर्यादित विद्यार्थ्यांना शिष्यवृत्ती दिली जाणार आहे.

शिष्यवृत्तीधारक झालेल्या विद्यार्थ्यांचे प्रमाणपत्र त्यांच्या बँक खात्याची व आधार क्रमांकची माहिती भरल्याशिवाय पाहता किंवा डाऊनलोड करता येणार नाही. परंतु, संकेतस्थळावरील गुणवत्ता यादीत त्याला स्वतःचा शिष्यवृत्ती संच प्रकार पाहता येईल. शासनमान्य मंजूर शिष्यवृत्ती संचाची संख्या मर्यादित असल्याने कट ऑफ शेकडा गुणांनी इतके एकूण गुण शेकडा गुण मिळवूनही प्रचलित निकषांची पूर्तता न करणारे विद्यार्थी यांचा समावेश गुणवत्ता यादीत करण्यात आलेला नाही. त्याचप्रमाणे मान्यता प्राप्त नसलेल्या शाळांमधून परीक्षेत प्रविष्ट झालेल्या विद्यार्थ्यांची समावेशही या यादीत झालेल्या नाही. तसेच नमूद केलेल्या कमाल वयोमर्यादा पेक्षा अधिक वयाच्या विद्यार्थ्यांची नावे गुणवत्ता यादीत समाविष्ट केली गेली नाहीत.