रिलायन्स फाऊंडेशनकडून पाच हजार विद्यार्थ्यांना शिष्यवृत्तीची घोषणा
फाऊंडेशनने डिसेंबर २०२२ मध्ये शिष्यवृत्तीबाबत घोषणा केली होती. त्यानुसार पुढील १० वर्षांमध्ये ५० हजार विद्यार्थ्यांना शिष्यवृत्ती दिली जाणार आहे.
eduvarta@gmail.com 
एज्युवार्ता न्यूज नेटवर्क
रिलायन्स फाऊंडेशनकडून (Reliance Foundation) २७ राज्यांतील पाच हजार विद्यार्थ्यांना शिष्यवृत्ती (Scholarship) देण्याची घोषणा करण्यात आली आहे. पदवीच्या पहिल्या वर्षातील या विद्यार्थ्यांना त्यांच्या शिक्षणादरम्यान सुमारे दोन लाख रुपये दिले जातील. शैक्षणिक सत्र २०२२-२३ साठी तब्बल ४० हजार विद्यार्थ्यांनी (Student) अर्ज केले होते. त्यातून शिष्यवृत्तीसाठी पाच हजार विद्यार्थ्यांची निवड करण्यात आली आहे.
फाऊंडेशनने डिसेंबर २०२२ मध्ये शिष्यवृत्तीबाबत घोषणा केली होती. त्यानुसार पुढील १० वर्षांमध्ये ५० हजार विद्यार्थ्यांना शिष्यवृत्ती दिली जाणार आहे. रिलायन्स फाऊंडेशन अंडरग्रॅज्युएट शिष्यवृत्ती विद्यार्थ्याची गुणवत्ता आणि आर्थिक स्थितीच्या आधारावर दिली जाते. या वर्षासाठी निवडलेले विद्यार्थी अभियांत्रिकी/तंत्रज्ञान, विज्ञान, वैद्यकीय, वाणिज्य, कला, व्यवसाय/व्यवस्थापन, संगणक, कायदा, वास्तुकला अशा विविध क्षेत्रातील आहेत.
हेही वाचा : शिकतानाच प्रशिक्षण घ्या अन् मिळवा नोकरी! कौशल्य विद्यापीठाची प्रवेश प्रक्रिया सुरू
शैक्षणिक सत्र २०२२-२३ साठी ४ हजार ९८४ शैक्षणिक संस्थांमध्ये शिकत असलेल्या सुमारे ४० हजार अर्जदारांमधून पाच हजार विद्यार्थ्यांची निवड करण्यात आली आहे. यशस्वी विद्यार्थ्यांपैकी ५१ टक्के मुली आहेत. तसेच ९९ दिव्यांग विद्यार्थ्यांनाही शिष्यवृत्तीही मिळाली आहे. ही निवड कठोर निकषांच्या आधारे केली जाते, यामध्ये पात्रता चाचणी, इयत्ता बारावीचे गुण आणि इतर निकषांचा समावेश आहे.
निवड झालेल्या विद्यार्थ्यांना त्यांच्या निवडीची माहिती www.reliancefoundation.org या संकेतस्थळावकर मिळेल. सत्र २०२२-२३ साठी निवडलेल्या रिलायन्स फाऊंडेशन पदव्युत्तर पदवीतील शिष्यवृत्तीची घोषणा जुलैमध्ये होण्याची शक्यता आहे. तर शैक्षणिक वर्ष २०२३-२४ साठी येत्या काही महिन्यांत अर्ज भरता येणार आहेत. “रिलायन्स फाऊंडेशन शिष्यवृत्ती तरुणांच्या स्वप्नांना पंख देईल. भारतातील विविध भौगोलिक भागात विविध विषयांचा अभ्यास करणाऱ्या विद्यार्थ्यांमधून शिष्यवृत्तीची निवड केली जाते. मुली आणि मुलांना समान प्रतिनिधित्व देण्यात आले आहे,” असे रिलायन्स फाऊंडेशनचे मुख्य कार्यकारी अधिकारी जगन्नाथ कुमार यांनी सांगितले.
शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.
