मुक्त विद्यापीठ देणार शेतकऱ्यांना कृत्रिम बुद्धिमत्ता वापराचे धडे

एज्युवार्ता न्यूज नेटवर्क 

यशवंतराव चव्हाण महाराष्ट्र मुक्त विद्यापीठ (Yashwantrao Chavan Maharashtra Open University), कॅनडा स्थित कॉमनवेल्थ ऑफ लर्निंगचे कॉमनवेल्थ एज्युकेशनल मीडिया सेंटर फॉर एशिया - कोल-सेमका नवी दिल्ली व महाराष्ट्र ज्ञान महामंडळ मर्यादित एम.के.सी.एल. यांच्यात 'शेतकऱ्यांसाठी कृत्रिम बुद्धिमत्ता ए. आय. आधारित साक्षरता व जागृती' या मराठी भाषेतील शिक्षणक्रम संदर्भात त्रिपक्षीय सामंजस्य करार (Tripartite Memorandum of Understanding) करण्यात आला. त्यामुळे आगामी काळात मुक्त विद्यापीठाकडून शेतकऱ्यांना कृतिम बुद्धिमत्ता वापराचे धडे दिले जाणार आहेत. 

विद्यापीठातील प्रशासकीय इमारतीतील व्यवस्थापन मंडळ सभागृह येथे कुलगुरू प्रा. संजीव सोनवणे, कोल-सेमकाचे नवी दिल्ली कार्यालयातील संचालक डॉ. बशीरहमाद शडूच व एम. के.सी.एल. चे महाव्यवस्थापक अमित रानडे यांनी या सामंजस्य करारावर स्वाक्षरी केली. यावेळी बोलताना विद्यापीठाचे मा. कुलगुरू प्रा. संजीव सोनवणे म्हणाले की, विद्यापीठाने प्रारंभी दहा हजार शेतकऱ्यांचे उद्दिष्ट निश्चित केलेले आहे. मराठी भाषेसह इतर आठ प्रादेशिक भाषा व आठ आंतरराष्ट्रीय भाषांमध्ये हा शिक्षणक्रम उपलब्ध केला जाणार आहे. येत्या नोव्हेंबरपासून त्याची सुरुवात करण्याचा मानस असल्याचे सोनवणे यांनी सांगितले.

डॉ. शडूच म्हणाले की, या शिक्षणक्रमास ब्राजील, केनिया, सर्बिया, नायझेरिया, आदी विविध देशांतून मागणी आहे. राज्यातील शेतकऱ्यांना त्याचा निश्चित फायदा होईल. रानडे, भारतातील इस्राईली दूतावासातील ए.आय. शिक्षणतज्ज्ञ माया शर्मन यांनीही मनोगत व्यक्त केले. याप्रसंगी विद्यापीठाचे प्र-कुलगुरू यांच्यासह आदी मान्यवर उपस्थित होते.