NTA कडून नीट यूजी 2025 रिझल्ट जाहीर

एज्युवार्ता न्यूज नेटवर्क 

राष्ट्रीय परीक्षा एजेंसीने (NTA) नीट यूजी २०२५ (NEET UG 2025) चा निकाल जाहीर (Results announced) केला आहे. ही परीक्षा वैद्यकीय शिक्षण अभ्यासक्रमांमध्ये (Medical education courses) प्रवेश घेण्यासाठी घेतली जाते. देशभरातील आणि परदेशातील परीक्षा केंद्रांवर 4 मे 2025 रोजी ही परीक्षा घेण्यात आली. बावीस लाखांहून अधिक विद्यार्थी या परीक्षेस बसले होते. एनटीएने अखिल भारतीय रँक जाहीर (All India Rank announced) केले आहेत. आता प्रवेश प्रक्रिया संबंधित प्राधिकरणांमार्फत पार पडेल. यासाठी विद्यार्थ्यांना प्रवेश प्रक्रियेची तयारी करावी लागणार आहे.

एनटीए आरोग्य आणि कुटुंब कल्याण मंत्रालय आणि शिक्षण मंत्रालयाच्या मान्यतेने नीट यूजी परीक्षा 2019 पासून घेत आहे. सर्वोच्च न्यायालयाच्या निर्देशानुसार हे आयोजन केले जाते. नॅशनल मेडिकल कमिशन ऍक्ट 2019 च्या कलम 14 नुसार, वैद्यकीय महाविद्यालयांमधील पदवीपूर्व अभ्यासक्रमांसाठी नीट यूजी ही एक सामायिक परीक्षा आहे. त्याचप्रमाणे, नॅशनल कमिशन फॉर इंडियन सिस्टम ऑफ मेडिसिन ऍक्ट 2020 च्या कलम 14 नुसार, MBBA, BAMS, BUMS आणि BSMS सारख्या भारतीय औषध प्रणालीच्या अभ्यासक्रमांसाठी NEET (UG) अनिवार्य आहे. होमिओपॅथीच्या BHMS अभ्यासक्रमासाठी देखील ही परीक्षा आवश्यक आहे.

एनटीएने 4 मे 2025 रोजी दुपारी 2:00 ते 5:00 या वेळेत NEET (UG) 2025 परीक्षा घेतली. ही परीक्षा देशभरातील 552 शहरांमधील 5468 केंद्रांवर आयोजित करण्यात आली होती. याव्यतिरिक्त, भारताबाहेरील 14 शहरांमध्येही परीक्षा घेण्यात आली. 22 लाखांपेक्षा जास्त उमेदवार या परीक्षेस बसले होते. ही परीक्षा 13 भाषांमध्ये घेण्यात आली. त्या भाषा आहेत: आसामी, बंगाली, इंग्रजी, गुजराती, हिंदी, कन्नड, मल्याळम, मराठी, ओडिया, पंजाबी, तमिळ, तेलगू आणि उर्दू या भाषांचा समावेश होता.