नवी मुंबईत स्थापन होणार भारतातील पहिली ‘इंटरनॅशनल एज्युकेशन सिटी'
ही इंटरनॅशनल एज्युकेशन सिटी CIDCO (City and Industrial Development Corporation) मार्फत आणि महाराष्ट्र सरकारच्या मार्गदर्शनाखाली विकसित करण्यात येत आहे. नवी मुंबई इंटरनॅशनल एअरपोर्टपासून फक्त 5 किलोमीटर अंतरावर ही सिटी उभारण्यात येणार आहे, ज्यामुळे जगभरातून विद्यार्थी व प्राध्यापकांसाठी येथे पोहोचणं सोपं होईल.
eduvarta@gmail.com 
एज्युवार्ता न्यूज नेटवर्क
भारतीय विद्यार्थ्यांना (indian students) जागतिक दर्जाचं शिक्षण देशातच उपलब्ध व्हावे याबरोबरच परदेशी विद्यापीठांच्या कॅंपसमुळे बहुसांस्कृतिक शैक्षणिक देवाण-घेवाण, संशोधनातील सहकार्य आणि विद्यार्थी व प्राध्यापकांमध्ये जागतिक पातळीवरील संवाद शक्य व्हावा या हेतूने राज्य सरकारने एक ऐतिहासिक पाऊल उचललं आहे. महाराष्ट्राला जागतिक शिक्षण केंद्र बनवण्यासाठी राज्य सरकारने ‘मुंबई राइजिंग’ या उपक्रमांतर्गत (Mumbai Rising Initiative) नवी मुंबईत भारतातील पहिलं इंटरनॅशनल एज्युकेशन सिटी (International Education City Navi Mumbai) उभारण्यात येणार आहे. या महत्त्वाकांक्षी प्रकल्पाअंतर्गत पाच जागतिक दर्जाची आंतरराष्ट्रीय विद्यापीठं मुंबई व नवी मुंबईत आपले कॅंपस उभारण्यासाठी LOI (Letter of Intent) स्वीकारणार आहेत.
आज दि. १४ जून २०२५ रोजी मुंबईतील ताज महाल पॅलेस हॉटेलमध्ये LOI प्रदान समारंभ आयोजित करण्यात आला आहे. या कार्यक्रमाला केंद्रीय शिक्षणमंत्री धर्मेंद्र प्रधान हे मुख्य पाहुणे म्हणून तर मुख्यमंत्री देवेंद्र फडणवीस, तसेच उच्च व तांत्रिक शिक्षणमंत्री चंद्रकांत पाटील यांचीही उपस्थिती असणार आहे.
महाराष्ट्रात कॅंपस उभारण्यासाठी LOI मिळवणाऱ्या विद्यापीठांची यादी
- अॅबरडीन विद्यापीठ (University of Aberdeen, UK)
- यॉर्क विद्यापीठ (University of York UK)
- पश्चिम ऑस्ट्रेलिया विद्यापीठ (University of Western Australia)
- इलिनॉय इन्स्टिट्यूट ऑफ टेक्नॉलॉजी (Illinois Institute of Technology, USA)
- इस्टिटूटो युरोपियो डिझाईन (Istituto Europeo di Design,IED, इटली)
ही विद्यापीठं शिक्षण, संशोधन आणि नावीन्यतेच्या क्षेत्रात जागतिक कीर्तीची आहेत.
ही इंटरनॅशनल एज्युकेशन सिटी CIDCO (City and Industrial Development Corporation) मार्फत आणि महाराष्ट्र सरकारच्या मार्गदर्शनाखाली विकसित करण्यात येत आहे. नवी मुंबई इंटरनॅशनल एअरपोर्टपासून फक्त 5 किलोमीटर अंतरावर ही सिटी उभारण्यात येणार आहे, ज्यामुळे जगभरातून विद्यार्थी व प्राध्यापकांसाठी येथे पोहोचणं सोपं होईल.
CIDCOच्या अधिकाऱ्यांनी सांगितलं की, 'ही भारतातली पहिली अशा प्रकारची शिक्षण नगरी असेल, जिथे एकाच ठिकाणी 10 आघाडीची जागतिक विद्यापीठं आपले कॅंपस सुरू करणार आहेत.
दरम्यान, या प्रकल्पामुळे भारतीय विद्यार्थ्यांचा परदेशात शिक्षणासाठी होणारा प्रवास कमी होईल, तसंच राज्याच्या आर्थिक विकासालाही चालना मिळेल. शिक्षण क्षेत्राशी संबंधित नोकरीच्या संधी, पायाभूत सुविधा आणि नाविन्यपूर्ण प्रकल्प निर्माण होतील, ज्यामुळे मुंबई आणि नवी मुंबई जागतिक शिक्षण केंद्र म्हणून ओळखली जाईल.
