MPSC च्या स्थापत्य अधिकारी सेवा मुख्य परीक्षेचा निकाल जाहीर

एज्युवार्ता न्यूज नेटवर्क 

महाराष्ट्र लोकसेवा आयोगामार्फत (MPSC) घेण्यात आलेल्या महाराष्ट्र स्थापत्य अधिकारी सेवा मुख्य 2023 परीक्षेचा निकाल आज जाहीर (Officer Service Main 2023 Exam Result Declared) करण्यात आला आहे. महाराष्ट्र स्थापत्य अधिकारी सेवा मुख्य भरती प्रक्रियेसाठी २८ जानेवारी २०२४ रोजी मुख्य परीक्षा पार पडली होती. परीक्षा होऊन आता वर्ष संपत आले आणि आज २७ जानेवारी रोजी अखेर  हा बहुप्रतीक्षित निकाल जाहीर झाला. 

राज्य लोकसेवा आयोगाने घेतलेल्या महाराष्ट्र स्थापत्य अधिकारी सेवा मुख्य परीक्षेचा निकाल एक वर्षापासून रखडला होता. त्यामुळे मागील एक वर्षापासून या निकालाच्या प्रतीक्षेत असलेल्या विद्यार्थ्यांमध्ये असंतोष पसरला जात होता. महाराष्ट्र स्थापत्य अधिकारी सेवेच्या ४९५ पदांसाठी ४ जून २०२३ रोजी पूर्व परीक्षा पार पडली, तर २८ जानेवारी २०२४ रोजी मुख्य परीक्षा पार पडली. परीक्षा होऊन वर्ष संपत आले तरी मुख्य परीक्षेचा निकाल रखडला निकाल लागत नव्हता. उमेदवारांनी अनेकवेळा या निकालाच्या संदर्भात आयोगाकडे विचारणा करण्यात आली होती. मात्र, त्यावर ठोक काहीच उत्तर मिळत नव्हते. 

महाराष्ट्र स्थापत्य अधिकारी सेवा मुख्य परीक्षेत राज्यभरातून जवळपास ५ हजारांपेक्षा अधिक  विद्यार्थ्यी सहभागी झालेले आहेत. यापुर्वी निकालाबाबत उमेदवारांना अनेकवेळा एमपीएससीच्या कार्यालयात जाऊन विचारणा केली असता, १५ दिवसांत निकाल जाहीर होईल, तर कधी पुढच्या महिन्यात निकाल जाहीर होईल असे उत्तर विद्यार्थ्यांना दिले जात होते. अशा सर्व उमेदवारांचा निकाल लागण्याने त्यांच्यामध्ये आनंदाचे वातावरण पाहायला मिळत आहे.