पुणे पुस्तक महोत्सवात ग्रंथपालांचे संमेलन उत्साहात

एज्युवार्ता न्यूज नेटवर्क 

पुणे पुस्तक महोत्सवाच्या निमित्ताने पुणे शहरातील विद्यापीठ महाविद्यालयीन शालेय आणि सार्वजनिक ग्रंथालयाच्या ग्रंथपालांचे संमेलन उत्साहात पार पडले. या संमेलनाला राष्ट्रीय पुस्तक न्यासाचे अध्यक्ष मिलिंद मराठे, सावित्रीबाई फुले पुणे विद्यापीठातील ग्रंथालय व माहितीशास्त्र विभागाचे निवृत्त प्राध्यापक डॉ. राजेंद्र कुंभार हे उपस्थित होते.

राष्ट्रीय पुस्तक न्यासाने वाचनासंबंधीचा अभ्यासक्रम सुरू करावा, असे आवाहन डॉ. कुंभार यांनी केले. राष्ट्रीय पुस्तक न्यासाचे अध्यक्ष मिलिंद मराठे यांनीही ग्रंथपालांनी वाचनासंबंधी अधिकाधिक प्रयत्न करावेत आणि त्यासाठी राष्ट्रीय पुस्तक न्यास त्यांना कायम सहकार्य करेल, अशी ग्वाही दिली.

राष्ट्रीय पुस्तक न्यासाचे संचालक कर्नल युवराज मलिक (निवृत्त) यांनीही ग्रंथपालांनी प्रशासकीय कामात न अडकता विद्यार्थ्यांना त्यांच्यापर्यंत जाऊन वाचन का करायचे, कसे करायचे, हे सांगणे आवश्यक असल्याचे सांगितले.

जयकर ग्रंथालयाचे संचालक डॉ. संजय देसले यांनी प्रास्ताविक केले. शालेय ग्रंथपाल संघटनेचे अध्यक्ष प्रदीप बागल यांनी आभार मानले. याप्रसंगी जिल्हा ग्रंथालय अधिकारी श्रेया गोखले यांच्या हस्ते ग्रंथपालांच्या वतीने मिलिंद मराठे यांचे आभार मानण्यात आले. या संमेलनाला पुणे शहरातील सर्व ग्रंथालयांचे मिळून १७७ ग्रंथपाल उपस्थित होते.  या कार्यक्रमाचे समन्वयन डॉ. चारुदत्त गंधे यांनी केले.