आंदोलन रोहित पवारांच्या राजकीय लॉन्चिंगसाठीच? विक्रम पाचपुते यांचा पुन्हा आरोप

एज्युवार्ता न्यूज नेटवर्क 

 एमपीएससी पेपरफुटी प्रकरणावरून सुरू असलेल्या विद्यार्थी आंदोलनाला राजकीय वळण देण्यात आले का, असा सवाल भाजप आमदार विक्रम पाचपुते यांनी उपस्थित केला आहे. मुख्यमंत्री देवेंद्र फडणवीस यांनी विद्यार्थ्यांच्या बहुतांश मागण्या मान्य केल्यानंतरही एमपीएससी अध्यक्षांच्या राजीनाम्याचा आग्रह धरून आंदोलन सुरू ठेवण्यामागे नेमका काय उद्देश होता, असा प्रश्न त्यांनी राष्ट्रवादी काँग्रेसचे आमदार रोहित पवार यांना विचारला आहे. हे आंदोलन विद्यार्थ्यांच्या प्रश्नांसाठी होते की रोहित पवार यांच्या राजकीय प्रतिमानिर्मितीसाठी, याचे उत्तर त्यांनी द्यावे, असे आव्हानही पाचपुते यांनी दिले.

आमदार पाचपुते म्हणाले की, ३० सप्टेंबर रोजी मुख्यमंत्री देवेंद्र फडणवीस यांनी विद्यार्थी प्रतिनिधींशी चर्चा करून त्यांच्या बहुतांश मागण्या मान्य केल्या होत्या. एमपीएससी अध्यक्षांचा राजीनामा घेणे हे मुख्यमंत्र्यांच्या थेट अधिकारक्षेत्रात येत नसल्याचे आपण यापूर्वीही स्पष्ट केले होते. अध्यक्षांबाबत निर्णय घेण्यासाठी घटनात्मक प्रक्रियेचे पालन आवश्यक असताना आंदोलन सुरू ठेवण्याचा आग्रह का धरण्यात आला, असा सवाल त्यांनी केला.

विद्यार्थ्यांच्या प्रश्नांवर तोडगा काढण्यासाठी सरकारने सकारात्मक भूमिका घेतल्यानंतरही आंदोलन सुरू राहिल्याने त्यामागील हेतूबाबत प्रश्न निर्माण होत असल्याचे पाचपुते यांनी म्हटले. आंदोलनाच्या माध्यमातून विद्यार्थ्यांच्या प्रश्नांची सोडवणूक करण्याऐवजी राजकीय वातावरण तापविण्याचा प्रयत्न झाला का, याचे स्पष्टीकरण मिळणे आवश्यक असल्याचे त्यांनी सांगितले.

आंदोलनाच्या शेवटच्या टप्प्यात विद्यार्थी आणि राजकीय कार्यकर्ते यांच्यातील फरक स्पष्ट झाल्याचा दावाही त्यांनी केला. आपल्याकडे असलेल्या व्हिडिओतून आंदोलनातील परिस्थिती दिसून येते, असे सांगत अनेक विद्यार्थी आंदोलनातून बाहेर पडल्याचे त्यांनी नमूद केले. त्यामुळे आंदोलनाच्या अंतिम टप्प्यात विद्यार्थ्यांच्या प्रश्नांपेक्षा राजकीय भूमिका अधिक महत्त्वाची ठरली होती का, असा प्रश्न त्यांनी उपस्थित केला.

एमपीएससी ही घटनात्मक संस्था असल्याने तिच्या अध्यक्षांना पदावरून हटविण्याबाबत स्वतंत्र घटनात्मक प्रक्रिया आहे, असे पाचपुते यांनी स्पष्ट केले. भारतीय संविधानाच्या कलम ३१७ चा उल्लेख करत त्यांनी अध्यक्षांविरोधातील कारवाई घटनात्मक मार्गानेच होणे आवश्यक असल्याचे सांगितले.

चौकशीची प्रक्रिया सुरू झाल्यानंतर अध्यक्ष रजेवर गेल्याचा उल्लेख करत, या प्रकरणात सरकारने घटनात्मक प्रक्रियेनुसार कार्यवाही करण्याची भूमिका घेतल्याचे त्यांनी म्हटले. ३० सप्टेंबर रोजीच चौकशीच्या प्रक्रियेबाबत सकारात्मक भूमिका स्वीकारली असती, तर पुढील संघर्ष टाळता आला असता, असेही ते म्हणाले.

विद्यार्थ्यांच्या प्रश्नांशी संबंधित आंदोलनात विविध राजकीय नेते, प्रभावशाली व्यक्ती आणि कलाकारांना सहभागी करून आंदोलनाचे स्वरूप बदलण्याचा प्रयत्न झाला का, असा प्रश्न पाचपुते यांनी उपस्थित केला. विद्यार्थ्यांच्या मागण्यांवर लक्ष केंद्रित करण्याऐवजी राजकीय प्रसिद्धीला प्राधान्य दिले गेले का, याचा विचार करण्याची गरज असल्याचे त्यांनी म्हटले.

स्पर्धा परीक्षांची तयारी करणाऱ्या विद्यार्थ्यांनी आपला अभ्यास आणि वेळ यांना प्राधान्य द्यावे, असे आवाहनही त्यांनी केले. राजकीय नेते त्यांच्या राजकीय प्रवासात पुढे जातील; मात्र आंदोलनामुळे विद्यार्थ्यांच्या अभ्यासाचे नुकसान झाले असेल, तर त्याची जबाबदारी कोण घेणार, असा सवाल त्यांनी केला.

 ‘विद्यार्थ्यांच्या भवितव्यापेक्षा राजकीय लॉन्चिंग मोठे नाही’

विद्यार्थ्यांच्या प्रश्नांसाठी आंदोलन करणे हा लोकशाही अधिकार असला, तरी त्यांच्या भावनांचा वापर राजकीय प्रतिमानिर्मितीसाठी होऊ नये, असे पाचपुते म्हणाले. मुख्यमंत्री फडणवीस यांनी विद्यार्थ्यांच्या प्रश्नांकडे संवेदनशीलतेने पाहून सकारात्मक निर्णय घेतल्याचे सांगत त्यांनी मुख्यमंत्र्यांचे आभार मानले.

“एमपीएससीचे विद्यार्थी अभ्यास करून अधिकारी होण्यासाठी संघर्ष करत आहेत; कोणाला राजकीय नेता बनवण्यासाठी नाहीत. या आंदोलनातून विद्यार्थ्यांना नेमके काय मिळाले आणि राजकीय फायदा कोणाला झाला, याचे उत्तर रोहित पवार यांनी द्यावे,” असे पाचपुते यांनी म्हटले.