सीईटी-सेलतर्फे परीक्षांचे संभाव्य वेळापत्रक जाहीर;वर्षातून 2 परीक्षा
राज्य सामाईक प्रवेश परीक्षा कक्षातर्फे २०२६ मध्ये एमएच – सीईटी पीसीएम समूहाची पहिली प्रवेश परीक्षा ११ एप्रिल ते १९ एप्रिल २०२६ मध्ये होणार असून दुसरी प्रवेश परीक्षा १४ मे ते १७ मे २०२६ मध्ये होणार आहे.
eduvarta@gmail.com 
एज्युवार्ता न्यूज नेटवर्क
राज्य सामाईक प्रवेश परीक्षा कक्षातर्फे (State Common Entrance Examination Class)२०२६ मध्ये घेतल्या जाणाऱ्या विविध पदवी व पदव्युत्तर अभ्यासक्रमाच्या प्रवेश परीक्षांचे संभाव्य वेळापत्रक (Possible schedule of entrance exams)जाहीर झाले आहे. मागील वर्षी प्रवेश परीक्षेमध्ये १४ लाख विद्यार्थ्यांनी नोंदणी केली होती, यामधील १२ लाख ४६ हजार विद्यार्थ्यांनी प्रवेश परीक्षा दिली होती.सीईटी-सेलने वर्षातून दोन वेळा परीक्षा घेण्याचा निर्णय घेतला आहे.त्यामुळे विद्यार्थ्यांना मोठा दिलासा मिळणार आहे.
मार्च ते मे २०२६ दरम्यान प्रवेश परीक्षांचे वेळापत्रक
सध्या २०२६ च्या १७ प्रवेश परीक्षाचे वेळापत्रक जाहीर केले आहे. यामध्ये पदवी अभ्यासक्रमाच्या १२ प्रवेश परीक्षा तर पदव्युत्तर अभ्यासक्रमाच्या ५ प्रवेश परीक्षा घेण्यात येणार आहेत. या प्रवेश परीक्षा सकाळी व दुपारी या सत्रात ऑनलाईन पद्धतीने राज्यातील विविध महाविद्यालयात घेतल्या जातील. तर काही प्रवेश परीक्षा सायंकाळच्या सत्रात घेतल्या जातील. या प्रवेश परीक्षा मार्च महिन्याच्या शेवटच्या आठवड्यात सुरु होऊन मे महिन्याच्या तिसऱ्या आठवड्यापर्यंत चालणार आहेत.
राज्य सामाईक प्रवेश परीक्षा कक्षातर्फे २०२६ मध्ये एमएच – सीईटी पीसीएम समूहाची पहिली प्रवेश परीक्षा ११ एप्रिल ते १९ एप्रिल २०२६ मध्ये होणार असून दुसरी प्रवेश परीक्षा १४ मे ते १७ मे २०२६ मध्ये होणार आहे. तर एमएच – सीईटी पीसीबी समूहाची पहिली प्रवेश परीक्षा २१ एप्रिल ते २६ एप्रिल २०२६ मध्ये होणार असून दुसरी प्रवेश परीक्षा १० मे व ११ मे २०२६ मध्ये होणार आहे. मागील वर्षी या दोन्ही समूहामध्ये ६ लाख ७५ हजार विद्यार्थ्यांनी परीक्षा दिली होती.
तसेच एमबीए/ एमएमएस या अभ्यासक्रमासाठी पहिली प्रवेश परीक्षा ६ एप्रिल ते ८ एप्रिल २०२६ मध्ये होणार असून दुसरी प्रवेश परीक्षा ९ मे २०२६ मध्ये होणार आहे. मागील वर्षी १ लाख ३८ हजार विद्यार्थ्यांनी ही प्रवेश परीक्षा दिली होती. एमसीएची प्रवेश परीक्षा ३० मार्च २०२६ , तीन वर्षीय विधीची प्रवेश परीक्षा १ व २ एप्रिल २०२६, पाच वर्षीय विधीची प्रवेश परीक्षा ८ मे २०२६ , नर्सिंगची प्रवेश परीक्षा ६ मे व ७ मे २०२६, बीएडची प्रवेश परीक्षा २७ मार्च ते २९ मार्च २०२६, बीपीएडची प्रवेश परीक्षा ४ एप्रिल २०२६, बीबीए, बीएमएस, बीबीएम, बीसीए व बी. एचएमसीटी प्रवेश परीक्षा २८ एप्रिल ते ३० एप्रिल २०२६ रोजी होणार आहे. इतर सर्व पदवी व पदव्युत्तर प्रवेश परीक्षांच्या तारखा सीईटी कक्षाने जाहीर केल्या आहेत. या सर्व प्रवेश परीक्षा मार्च ते मे २०२६ दरम्यान होणार आहेत.
प्रवेश परीक्षेच्या दोन संधी
राष्ट्रीय स्तरावर जेईईच्या (मेन ) दोन प्रवेश परीक्षा होतात. त्यामुळे विद्यार्थ्यांना दोनदा संधी उपलब्ध होते. दोन संधी महाराष्ट्रातील मुलांनाही मिळाव्यात म्हणून यावर्षापासून सीईटी कक्षाने या वर्षापासून एमएच सीईटी पीसीएम, पीसीबी व एमबीए या तीन अभ्यासक्रमाच्या प्रवेश परीक्षा (सीईटी) दोन वेळेस घेण्याचा निर्णय घेतला आहे. यानुसार पहिली प्रवेश परीक्षा एप्रिल-२०२६ मध्ये तर दुसरी प्रवेश परीक्षा मे २०२६ महिन्यात होणार आहे. विद्यार्थ्याला एक प्रवेश परीक्षा देणे बंधनकारक असून दुसरी प्रवेश परीक्षा ऐच्छिक असेल. जर विद्यार्थ्याने दोन प्रवेश परीक्षा दिल्यास तर त्याला दोन्हीपैकी ज्यामध्ये जास्त गुण असतील ते प्रवेशासाठी गृहीत धरले जातील.
---------------------------------------
