CBSE: 10वी, 12वीच्या प्रॅक्टिकल परीक्षेसाठीच्या मार्गदर्शक सूचना प्रसिद्ध
देशाच्या ज्या भागात जानेवारी महिन्यात थंडीचे प्रमाण खूप जास्त असते अशा भागांमध्ये प्रात्यक्षिक परीक्षा 5 नोव्हेंबर पासून सुरू होणार आहेत. तर देशाच्या उर्वरीत भागात ही परीक्षा जानेवारी महिन्यापासून सुरू होणार आहे.
eduvarta@gmail.com 
एज्युवार्ता न्यूज नेटवर्क
केंद्रीय माध्यमिक शिक्षण मंडळाने (Central Board of Secondary Education) CBSE नवीन नोटीस (notice) प्रसिद्ध करत 10 वी आणि 12 वीच्या बोर्डाच्या प्रात्यक्षिक परीक्षांसाठी (10th, 12th practical Exams) मार्गदर्शक सूचना प्रसिद्ध (Guidelines published) केल्या आहेत. त्यानुसार दहावीच्या नियमित विद्यार्थ्यांचे (students) अंतर्गत मूल्यमापन त्यांच्या शाळांकडून संबंधित विषयाच्या अभ्यासक्रमाच्या आधारेच केले जाणार आहे. यासाठी कोणत्याही बाह्य परीक्षकाची (external examiner) नियुक्ती केली जाणार नाही. प्रात्यक्षिक उत्तरपत्रिकांची (practical answer sheets) व्यवस्थाही शाळांनाच करावी लागणार आहे, उत्तरपत्रिकांचा पुरवठा बोर्डाकडून होणार नाही.
CBSE 12वीच्या प्रात्यक्षिक आणि प्रकल्प मूल्यांकनासाठी बाह्य परीक्षक असतील, ज्यांची नियुक्ती मंडळाकडून केली जाईल. शाळा त्यांच्या स्तरावर याबाबत कोणतीही व्यवस्था करणार नाहीत. शाळा प्रकल्प आणि प्रात्यक्षिक दोन्हीसाठी 30-30 विद्यार्थ्यांच्या तुकड्या तयार करू शकतात. या बॅचेस तेव्हाच बनवता येतील जेव्हा शाळांना CBSE द्वारे बाह्य परीक्षकाचा तपशील मिळेल आणि तो परीक्षक नियोजित तारखेला त्याच्या उपस्थितीची पुष्टी करेल, असेही त्या सूचनांमध्ये नमूद करण्यात आले आहे.
तसेच CBSE ने 10वी, 12वीच्या प्रॅक्टिकलच्या तारखांची माहिती देखील जाहीर केली आहे. ही परीक्षा देशभरात एकाच वेळी घेतली जाणार नाही. देशाच्या ज्या भागात जानेवारी महिन्यात थंडीचे प्रमाण खूप जास्त असते अशा भागांमध्ये प्रात्यक्षिक परीक्षा 5 नोव्हेंबर पासून सुरू होणार आहेत. तर देशाच्या उर्वरीत भागात ही परीक्षा जानेवारी महिन्यापासून सुरू होणार आहे.
