ब्रिटनच्या विद्यापीठाचे होणार भारतात पहिले परदेशी कॅम्पस

एज्युवार्ता न्यूज नेटवर्क

भारतातील पहिले परदेशी कॅम्पस (India's first overseas campus) ब्रिटनच्या साउथॅम्प्टन विद्यापीठाचे (University of Southampton, UK) असेल,  अशी माहिती समोर येत आहे. केंद्र सरकारने (Central Govt) यासंदर्भातील पत्र विद्यापीठाच्या प्रतिनिधींना सुपूर्द केले आहे. युनिव्हर्सिटी ऑफ साउथम्प्टनच्या  दिल्ली-एनसीआर (University of Southampton Delhi-NCR) कॅम्पसमध्ये जुलै 2025 पासून अभ्यास सुरू होईल. व्यवसाय, व्यवस्थापन, संगणन, कायदा, अभियांत्रिकी (Business, Management, Computing, Law, Engineering etc.) यांसह अनेक प्रकारचे अभ्यासक्रम येथे शिकविले जाणार आहेत.

केंद्रीय परराष्ट्र मंत्री डॉ. एस. जयशंकर (Union Foreign Minister Dr. S. Jaishankar) यांच्या उपस्थितीत साऊथॅम्प्टन विद्यापीठाच्या अधिकाऱ्यांना हे पत्र सुपूर्द करण्यात आले. ते म्हणाले की, भारत आणि ब्रिटनमध्ये शैक्षणिक क्षेत्रात मोठी भागीदारी झाली आहे. या विद्यापीठात जुलै २०२५ पासून अभ्यास सुरू होईल.

यूजीसीचे अध्यक्ष प्रा. एम. जगदीश कुमार यांनी सांगितले , "साउथॅम्प्टन युनिव्हर्सिटी कॅम्पसमध्ये नवीन सत्र सुरू होण्याच्या सहा महिने आधी प्रवेश प्रक्रिया सुरू करू शकते. युनिव्हर्सिटी ऑफ साउथम्प्टनच्या इंडिया कॅम्पसमध्ये प्रदान केल्या जाणार्‍या पदव्या यजमान विद्यापीठाच्या पदवी सारख्याच असतील. म्हणजेच ब्रिटनमधील या विद्यापीठात शिकणाऱ्या विद्यार्थ्यांच्या पदवीचे जे महत्व आहे, तेच महत्व भारतातील कॅम्पसमध्ये शिकणाऱ्या विद्यार्थ्यांनाही मिळणार आहे.

प्रा. जगदीश कुमार म्हणाले , "साउथॅम्प्टन युनिव्हर्सिटीने गुरुग्राममध्ये शाखा कॅम्पस सुरु करण्याचा प्रस्ताव सादर केला होता. ज्याला यूजीसीच्या स्थायी समितीने नियमानुसार एलओआय जारी करण्यास मान्यता दिली. मात्र, या विद्यापीठाची इच्छा असल्यास ते देशातील इतर ठिकाणीही आपले कॅम्पस सुरू करण्यासाठी अर्ज करू शकतात. किमान 10 ते 15 परदेशी विद्यापीठांनी भारतात त्यांचे कॅम्पस सुरू करण्याची इच्छा व्यक्त केली आहे आणि या संदर्भात लवकरच निर्णय घेतला जाऊ शकतो."

साउथॅम्प्टन विद्यापीठाची स्वतःची प्रवेश प्रक्रिया असेल. विद्यापीठाला हवे असल्यास ते प्रवेश परीक्षा घेऊ शकते, हवे असल्यास बारावीच्या गुणांना वेटेज देऊ शकते आणि परीक्षा आणि गुण या दोन्हींचे सूत्र स्वीकारू शकते. मात्र विद्यार्थ्यांना सहा महिने अगोदरच प्रवेश कसे होणार हे सांगितले जाईल.  

साउथॅम्प्टन विद्यापीठाने आपला कॅम्पस भारतात बांधण्यासाठी दहा वर्षांचा अंदाजित अभ्यासक्रम आराखडा सादर केला आहे. पहिल्या वर्षी बीएस्सी कॉम्प्युटर सायन्स, बीएस्सी बिझनेस मॅनेजमेंट, बीएस्सी अकाउंटिंग अँड फायनान्स, बीएस्सी इकॉनॉमिक्स, एम.एस्सी इंटरनॅशनल मॅनेजमेंट,एम.एससी फायनान्स असे अभ्यासक्रम असतील. दुसऱ्या वर्षी, विद्यापीठ B.Sc सॉफ्टवेअर अभियांत्रिकी, B.Sc क्रिएटिव्ह कॉम्प्युटिंग, M.Sc अर्थशास्त्र अभ्यासक्रम जोडेल. तिसऱ्या वर्षात एलएलबी लॉ आणि बी. अभियांत्रिकी (मेकॅनिकल इंजिनीअरिंग) अभ्यासक्रम जोडला जाईल. त्याचप्रमाणे दरवर्षी नवीन अभ्यासक्रमांची भर पडणार आहे.

दरम्यान, 2024-25 पासून ऑस्ट्रेलियाच्या डीकिन युनिव्हर्सिटी आणि वॉलोंगॉन्ग विद्यापीठाच्या भारतीय कॅम्पसमध्ये अभ्यास सुरू झाला आहे. परंतु हे कॅम्पस गांधीनगरमधील गुजरात इंटरनॅशनल फायनान्स टेक-सिटी (GIFT सिटी) मध्ये बांधले गेले आहेत, जे UGC नियमांमध्ये समाविष्ट नाहीत.