पुण्याच्या विद्यार्थिनीला जपान सरकारची लाखाची शिष्यवृत्ती

एज्युवार्ता न्यूज नेटवर्क

दरवर्षी जपान सरकार (Government of Japan) संशोधक विज्ञार्थ्यांना (Researchers) शिष्यवृत्ती देते. विदेशांशी परस्पर समंजसपणा वाढविणे, जपानी विद्यापीठांच्या शैक्षणिक व संशोधन क्षमतांना बळकटी देणे आणि आंतरराष्ट्रीय बौद्धिक योगदान मिळावं यासाठी जपान सरकारमार्फत शिष्यवृत्ती (scholarship) देण्यात येते. त्यात पुण्यातील कोथरुडमध्ये राहणाऱ्या अथर्वी थोरात (Atharvi Thorat living in Kothrud, Pune) हिला जपान सरकारची प्रतिष्ठेची मानली जाणारी मेक्स्ट (मोनबुकागाकुशो) शिष्यवृत्ती जाहीर (MEXT Scholarship Announced) झाली आहे.

अथर्वीने पुण्यातील सिंहगड कॉलेज ऑफ इंजिनिअरींग येथून बी.ई (स्थापत्य अभियांत्रिकी) ही पदवी घेतली आहे. नागोया विद्यापीठातील कॉंक्रिट साहित्य आणि संरचना प्रयोगशाळा, फोरफ्रंट स्टडीज प्रोग्राम यामध्ये तिची निवड झाली आहे. या शिष्यवृत्तीतून तिला दरमहा सुमारे एक लाख रुपये शिक्षण भत्ता मिळणार आहे. तिचे संपुर्ण पदवीत्युत्तर शिक्षणाचे शिक्षण शुल्क, राउंड ट्रीपसाठीचा विमान खर्च,  जपान सरकारच्या शिक्षण, संस्कृती, क्रीडा, विज्ञान आणि तंत्रज्ञान मंत्रालयाकडून देण्यात येणार आहे.

अथर्वी जपान मधील टॉप दहा विद्यापीठात समाविष्ट असलेल्या "नागोया यूनिवर्सिटी" (Nagoya University) या शासकीय विद्यापीठात पदवीत्युत्तर शिक्षण व संशोधन (Post Graduate Education and Research) करणार आहे. उत्तम शैक्षणिक कामगिरीच्या जोरावर ही विदयार्थीनी 'मेक्स्ट' शिष्यवृत्ती मिळवून जपानला रवाना झाली आहे. जपानी प्राध्यापक डॉक्टर हिकारु नाकामुरा (Professor Dr. Hikaru Nakamura) यांच्या मार्गदर्शनाखाली ती "प्रगत संरचनात्मक विश्लेषण आणि भूकंप प्रतिरोधकतेसाठी  केबल-स्टे प्री-स्ट्रेस्ड पुलांचे डिझाइन ऑप्टिमायझेशन" (Advanced structural analysis and design optimization of cable-stay pre-stressed bridges for earthquake resistance) या विषयावर स्थापत्य आणि पर्यावरण अभियांत्रिकी विभागात संशोधन करणार आहे.

या शिष्यवृत्ती अंतर्गत अथर्वीला संशोधनासाठी २ वर्षाचा कालावधी मिळणार आहे. त्याचबरोबर तिला जपानी भाषेचे प्रशिक्षण आणि संस्कृतीची माहिती देखील दिली जाणार आहे. या शिष्यवृत्तीसाठी कोणतेही अर्ज शुल्क आकारले जात नाही, इच्छुक विद्यार्थी शिष्यवृत्तीच्या अटी, अर्जाची प्रक्रिया आणि अर्ज डाउनलोड करण्यासाठी https://www.in.emb-japan.go.jp/itprtop_en/index.html ही वेबसाइट पाहू शकतात.