डॉ. बाबासाहेब आंबेडकर मराठवाडा विद्यापीठाची पीएच.डी. एंट्रान्स टेस्ट ३ ऑक्टोबर रोजी

एज्युवार्ता न्यूज नेटवर्क

डॉ. बाबासाहेब आंबेडकर मराठवाडा विद्यापीठाची (Dr. Babasaheb Ambedkar Marathwada University) पीएच.डी. एंट्रान्स टेस्ट (PET-2024) ३ ऑक्टोबर रोजी (Examination on 3rd October) घेण्यात येणार आहे. त्यापूर्वी पेट परीक्षेसाठी पात्र, अपात्र उमेदवारांची अंतिम यादी जाहीर करण्यात आली आहे. त्यानुसार विविध ११ केंद्रांवर पाच सत्रांत ही परीक्षा घेण्यात येणार आहे. त्यासाठी २६ सप्टेंबरपासून ऑनलाइन प्रवेशपत्र मिळायला सुरूवात होईल. 

पेट परीक्षेसाठी १४ हजार १२५ अर्जांपैकी ११ हजार ४४८ विद्यार्थी हे ३ ऑक्टोबर रोजी होणार्‍या पेट परीक्षेसाठी पात्र ठरले आहेत. १ हजार ९९८ विद्यार्थी पेट परीक्षेतून अपात्र ठरले आहेत. तर दोन वेळा संधी देऊनही मूळ शैक्षणिक कागदपत्रांची पूर्तता न केल्यामुळे ६७९ जणांना पेटसाठी अपात्र ठरवण्यात आले आहे. चार विद्याशाखांतर्गत ४४ विषयांसाठी ही पेट परीक्षा होत असून एकूण ४९७ संशोधकांकडे आजघडीला १ हजार ५७६ जागा रिक्त आहेत. 

छत्रपती संभाजीनगर शहरात देवगिरी महाविद्यालय, विवेकानंद महाविद्यालय, मिलिंद विज्ञान महाविद्यालय, स.भु. विज्ञान महाविद्यालय, स.भु. कला वाणिज्य महाविद्यालय, बीड येथे बलभीम महाविद्यालय, केएसके कॉलेज, धाराशिव येथे डॉ. बाबासाहेब आंबेडकर मराठवाडा विद्यापीठाचे उपकेंद्र, आर.पी कॉलेज, जालना येथे जेईएस कॉलेज, अंकुशराव टोपे कॉलेज येथे पेट परीक्षेसाठी केंद्र देण्यात आले आहे.