पूजा खेडेकर वादानंतर IAS अर्ज प्रक्रियेत महत्त्वाचे बदल

केंद्रीय लोकसेवा आयोगाने (Union Public Service Commission) UPSC नागरी सेवा २०२५ परीक्षा अर्ज प्रक्रियेत महत्त्वाचे बदल केले आहेत. (Important changes have been made in the Civil Services 2025 exam application process) यूपीएससीने प्रसिद्ध केलेल्या अधिसूचनेनुसार, आयोगाने प्राथमिक परीक्षा (प्रिलिम्स) स्तरावरच शैक्षणिक, जात आणि शारीरिक अपंगत्व प्रमाणपत्र यासारखी कागदपत्रे ऑनलाइन सादर करणे अनिवार्य केले आहे. पूजा खेडेकर वादानंतर हे पाऊल उचलण्यात आले आहे, (This step has been taken after the Pooja Khedekar controversy)  पूर्वी, उमेदवारांना मुख्य परीक्षा उत्तीर्ण झाल्यानंतरच ही कागदपत्रे अपलोड करणे आवश्यक होते.

अधिकृत सूचनेनुसार,'नागरी सेवा परीक्षेसाठी अर्ज करू इच्छिणाऱ्या उमेदवारांनी ऑनलाइन अर्ज करताना जन्मतारीख, श्रेणी (जसे की SC/ST/OBC/EWS/PwBD/माजी सैनिक), शैक्षणिक पात्रता आणि सेवा प्राधान्ये यासारख्या तपशीलांसह फॉर्म भरावा लागेल. ऑनलाइन अर्जासोबत आवश्यक माहिती आणि संबंधित सहाय्यक कागदपत्रे सादर करावी लागतील. विशेष म्हणजे, यूपीएससी सीएसई २०२५ प्रिलिम्स परीक्षेसाठी अर्ज करणाऱ्या उमेदवारांना शैक्षणिक प्रमाणपत्र, जात प्रमाणपत्र, शारीरिक अपंगत्व प्रमाणपत्र कागदपत्रे ऑनलाइन फॉर्ममध्ये अपलोड करावी लागतील. प्राथमिक अर्ज प्रक्रियेदरम्यान उमेदवारांनी आवश्यक कागदपत्रे किंवा माहिती अपलोड केली नाहीत तर त्यांची उमेदवारी रद्द केली जाईल, असे आयोगाने स्पष्ट केले आहे. 

अधिसूचनेनुसार, उमेदवारांना प्राथमिक परीक्षेच्या निकालानंतर १० दिवसांचा कालावधी कॅडर पसंतीक्रम सादर करण्यासाठी मिळेल. याशिवाय, मुलाखतीसाठी पात्र ठरलेल्या उमेदवारांना नागरी सेवा (मुख्य) परीक्षेचा निकाल जाहीर झाल्यानंतर १५ दिवसांचा वेळ दिला जाईल. अधिक माहितीसाठी, UPSC च्या https://upsc.gov.in/ या अधिकृत वेबसाइटला भेट द्या.

यावर्षी, यूपीएससीने भारतीय प्रशासकीय सेवा (IAS), भारतीय परराष्ट्र सेवा (IFS) आणि भारतीय पोलिस सेवा (IPS) साठी 979 पदांची घोषणा केली आहे, जी गेल्या तीन वर्षातील सर्वात कमी पदांची संख्या आहे.